Lettre MCCCXXII. Au Père René Ayrault, de la Compagnie de Jésus

Compliments affectueux à un ancien " compaignon d'escole. "- Deux prises de voile à la Visitation .

La Roche, [24-28 juin ] 1617.

Mon Reverend Pere,

J'ay receu a beaucoup d'honneur la lettre que Mlle Favreau et Mlle d'Albamé m'escrivirent de vostre part ; car, outre la douceur que je prens a me ramentevoir le tems auquel nous estions compaignons d'escole , vos merites me font grandement estimer tous les tesmoignages quil vous plait me donner de vostre bienveuillance, laquelle je vous conjure de me vouloir continuer par vostre courtoysie, bien ayse de sçavoir que vous soyes arresté en nostre voysinage, sous l'esperance que, par ce moyen, il se pourra bien faire que j'are encor un jour lhonneur de vous revoir.

Et cependant, je cheriray de tout mon cœur tout ce quil vous plaira de me recommander, comme je fay le sujet d'avoir soin plus particulier de ces deux damoyselles, desquelles l'une, madamoyselle Favreau, est desja voylee, et l'autre le sera soudain que je seray de retour d'un voyage que je vay faire a Thonon ; et espere que l'un'et l'autre donneront [et recevront ] reciproquement de l' edification et consolation en la Congregation en laquelle elles ont esté appellees, puisque a ce commencement Dieu leur en donne de si bonnes arres.

Playse a la divine Bonté de vous conserver et prosperer de plus en plus en son saint service, et je suis de tout mon cœur,

Mon Reverend Pere,

Vostre plus humble, tres affectionné

confrere et serviteur,

FRANçs, E. de Geneve

1617, a La Roche.

Revu sur l'Autographe conservé à Beaufort, chez les Sœurs Hospitalières de Saint- Joseph.