Lettre MDXXXVI. Au Prince de Piémont, Victor-Amédée

La détresse du duc de Nemours. - François de Sales appuie sa cause. Désir de l'Evêque de retourner en son diocèse.

Paris, 29 juillet l619.

Monseigneur,

La lettre que Vostre Altesse a escrit a Monsieur le Duc de Nemours a esté receue par luy trois jours avant que la copie m'ayt esté remise en main, de sorte que des-ja il m'avoit parlé sur le sujet d'icelle, non sans se douloir du retardement pour l'article qui regarde son payement, deu par le sieur Bonfilz des il y a long tems, a ce qu'il dit, et par le manquement duquel toute sa mayson et ses affaires sont extremement incommodés ( note 950 ) ; dont il ne peut esperer le remede que de la promesse qu'il a pleu a Vostre Altesse de luy faire, d'avoir du soin et de la bienveuillance pour luy qui, a la verité, n'est pas sans beaucoup d'inquietude parmi la necessité en laquelle il se treuvé

(sic), ayant si peu de revenuz de deça, ou ses terres sont presque toutes engagees, et ne jouissant de celuy qu'il [a] en Savoye, qui est son fond principal. Je me suis essayé de le soulager de parole et d'accroistre la confiance qu'il a en Vostre Altesse, selon le commandement delaquelle j'arresteray ou partiray ainsy qu'il luy plaira, ne doutant point qu'elle ne face toute la consideration requise du devoir que j'ay de retourner en ma residence, soudain qu'elle jugera que mon retardement de deça ne pourra plus estre utile a son service.

Et tandis, priant Dieu pour la prosperité de Vostre Altesse, Monseigneur, je suis,

Vostre tres humble, tres obeissant et tres fidele

orateur et serviteur,

FRANÇs, E. de Geneve.

A Paris, le 29 julliet 1619.

Revu sur l'Autographe conservé à Turin, Archives de l'Etat.