Lettre MDXXXVIII. À la Mère de Chantal, a Paris

Obligeante intervention de M. de Neufchèzes dans une affaire. - Le saint Evêque, malade, est obligé de contremander plusieurs sermons.

Paris, 31 juillet 1619.

Les lettres sont de M. de Neufcheze, vostre neveu bienaymé , qui me fit la faveur de se charger d'une requeste que j'avois addressee au Clergé pour M. Boucard , et a obtenu cent escus de pension annuelle. Reste que je m'essaye de gaigner ceux qui doivent les delivrer.

Ce matin, a quatre heures, le flux de ventre m'a repris, et m'a mené huit ou neuf fois jusqu'a disné. Il semble que cela soit un peu accoysé maintenant ; c'est pourquoy j'ay envoyé a ces bonnes dames leur dire que sur les deux heures je pourray avoir l'honneur de leur visite ; et si monsieur de Meneville venoit sur les quatre heures, j'en serois bien ayse.

Cependant il faut avoir patience de demeurer sans vous voir pour ce jourd'huy, et de demeurer sans rien faire ; car j'ay contremandé par tout ou j'avois promis de prescher, et, ce qui m'a bien fasché, j'ay contremandé le Pere Recteur du Noviciat des Jesuites , qui a les Quarante Heures et les octaves du bienheureux Ignace, duquel j'avais desir de parler. Mays il faut demeurer en paix en tout nostre cœur, et unis en la tressainte volonté de Nostre Seigneur.

Bon soir, ma tres chere Mere. J'ay grand desir de vous entretenir et apprendre de vous les pensees de vostre bon Seigneur de Lion . La bonne Mere de Port Royal me prie de la recommander de rechef a vos prieres : je le fay de tout mon cœur.

Dieu soit a jamais vostre vie, ma tres chere Mere, Amen ; et de toute vostre petite trouppe. Amen.

FRANçs, E. de Geneve.

Le 31 julliet 1619.