Lettre MDCCLI. À Madame le Maistre

Beaucoup de lettres, lettres courtes. - Une vie attachée à la croix. - Arrêt facile et salutaire sur le chemin de Rome. - Famille chrétienne.

Annecy, 24 janvier 1621.

Je n'escris jamais moins que quand j'escris beaucoup, ma tres chere Fille; la multitude des lettres en empesche la longueur, au moins a moy. Mais vostre cœur est bon, ma tres chere Fille, et je croy fermement qu'il connoist bien le mien, puisque Dieu l'a ainsy voulu. Mais de ne vous point escrire du tout, il ne m'est pas possible. En somme, ce n'est que pour vous saluer de toute l'estendue de mes affections, ma tres chere Fille, et vous asseurer que je n'oublie point vos afflictions, ni la condition de vostre vie attachee a la croix. Dieu, par sa bonté, en veuille bien sanctifier son nom et exalter sa gloire.

Je vous prie, au reste, de dire a madamoyselle vostre mere que je suis de cœur l'un de ses enfans ; mays je le dis en verité. Et quand elle ira en esprit a Rome voir celuy qui y est, nostre bon frere , c'est son chemin de passer par icy, et sa commodité de s'arrester un peu parmi ces montaignes.

Or sus, de plus je salue M.. d'Andilly et madamoyselle d'Andilly ; en somme, toute cette chere famille, ou la crainte, ains l'amour de Dieu regne, et sur laquelle j'invoque tres affectueusement la providence et protection divine. Salues bien a part, et comme vostre ame sçait qu'il le faut, le cœur de nostre Seur Marie Angelique , et dites luy que le mien est a elle, et que Dieu l'a voulu et le veut, ma tres chere Fille.

Amen.

24 janvier 1621, Annessi.