[78]

¹ Unde, quodam tempore, paucis annis post conversionem suam cum ambularet quadam die solus per viam non multum longe ab ecclesia Sancte Marie de Portiuncula, ibat alta voce plangendo et eiulando (cfr. Ez 27,30). ² Cumque sic ambularet, quidam spiritualis homo, quem novimus et ab eo istud intelleximus, qui multam misericordiam et consolationem fecerat sibi antequam haberet fratrem aliquem et postea similiter, obviavit illi, ³ et motus pietate circa ipsum interrogavit eum dicens: "Quid habes, frater?". ⁴ Putabat enim quod haberet dolorem alicuius infirmitatis. ⁵ At ille: "Ita deberem ire plangendo et eiulando sine verecundia per totum mundum passionem Domini mei". ⁶ At ille una cum ipso cepit plorare et fortiter lacrimari.