Lettre CDLVI. À Monseigneur Pierre Fenouillet, Évêque Élu de Montpellier

(INÉDITB)

Eloge de des Hayes, " le grand amy " de Pierre Fenouillet et de l'Evêque de Genève. - C'est surtout sur les petits lacs d'eau douce que la barque du Saint se plaît à voguer.

Annecy, 23 mai 1608

Monsieur,

Je cours apres vous par ces deux motz pour vous rendre graces de la faveur que vous me faites, si abondamment tesmoignee par vostre lettre. J'escrivis il y a quinze jours a nostre grand amy (lettres 449,450) , et luy addressay une lettre pour Sa Majesté, que je remerciois, suivant le conseil que vous me donnes avant que je l'eusse receu ; tant mon affection, qui est vostre, a de pouvoir de tirer mon esprit a quelque conformité du vostre, duquel, en toutes parties, il est au demeurant inferieur.

Je m'esjouis d'une joye toute particuliere sur l'advancement de ce digne amy , duquel le merite se fera tousjours plus paroistre en montant, comme fait le soleil ; et ce grand Roy, qui le tire apres sa prouvoyance, le portera sans doute bien plus haut.

Pour lhonneur que Sa Majesté me fait, je l'admire d'autant plus que je ne vois rien en moy qui n'en soit extremement indigne, et ne doute point que vostre bienveuillance en mon endroit et celle de nostre amy ne soyent le seul vent qui enfle la voyle de ma barque pour la porter en cette haute mer, en laquelle, si Dieu me fait passer, ce ne sera pas sans un grand danger, puisqu'elle n'est pas pour les eaux salees de l'Ocean, mais pour nos petitz lacs d'eau douce.

Monsieur vostre cousin m'arrache cette lettre d'entre les mains, car il veut partir et il est tard. Nostre Seigneur vous prospere, Monsieur, et je suis extremement,

Vostre serviteur tres humble,

FRANçs, E. de Geneve.

23 may 1608.

Revu sur une copie déclarée authentique, conservée à la Visitation de Montpellier.