Lettre CDLXVII. Au Père Pierre Dubouloz, Dominicain

(INÉDITE)

Election d'un prieur au couvent des Dominicains d'Annecy ; l'élu est prié avec une aimable insistance d'accepter cette charge.

Annecy, 8 juillet 1608.

Monsieur nostre Maistre,

Ayant sceu que les bons Peres Religieux de cette ville vous avoyent esleu pour leur Prieur, je m'en suis extremement res-joüy ; et ne pouvant aller moy mesme vous faire la priere quilz vous veulent presenter de vouloir accepter cett'election et charge, je vous envoye cet escrit, qui vous tesmoignera que jamais vous n'aves esté ni desiré ni demandé avec plus d'affection et de sincerité que vous l'estes d'eux et de moy, qui, en particulier, m'essayeray de vous servir si promptement en toutes occurrences, que vous n'aures pas, Dieu aydant, occasion [de vous repentir] d'avoir gratifié mon desir. Les Religieux aussi se disposent a vous obeir et soulager si entierement que vous ne perdres nullement le repos requis a vostr'aage et a vostre contemplation. Faites nous donques a tous ce bien que de ne point esconduire nostre juste demande, qui regarde la gloire de Dieu et le restablissement d'un couvent tout entier.

Je me prometz bien que l'amitié que vous me portés intercedera encor pour moyen cett'occasion ; c'est pourquoy, finissant, je prieray Nostre Seigneur quil vous prospere et inspire a nostre consolation, demeurant,

Monsieur,

Vostre serviteur tres affectionné,

FRANÇ', E. de Geneve.

VIII julliet 1608.

A Monsieur nostre Maistre,

Le R. P. de Bollo, Docteur en theologie.

A St Dominique de Chamberi.

Revu sur .l'Autographe conservé à la Visitation de Saint-Marcellin.