Lettre CDLIX. À Mademoiselle Claudine de Chastel

Dieu protège les vœux qu'il a inspirés. - Il n'est pas toujours possible ni à propos de fuir, mais il est toujours nécessaire de combattre avec opiniâtreté. - Les afflictions qui aident à bien servir Dieu. - Conseils pour l'oraison. - Bonheur de s'être consacré à Notre-Seigneur.

Annecy, [fin mai ou commencement de juin ]1608 .

Madamoyselle,

Je garderay cherement le billet de vostre vœu et Dieu en gardera la fermeté ; il en a esté l'autheur il en sera le conservateur. Je feray souvent pour cela la priere de saint Augustin (Confess 12, 27) : Helas ! Seigneur, voyla un petit poussin esclos sous les aysles de vostre grace : s'il s'escarte de l'ombre de sa mere, le milan le ravira ; faites donq qu'il vive a la faveur et a l'abry de la grace qui l'a produit.

Mais voyés-vous, ma Seur ; il ne faut pas seulement penser si cette resolution sera perdurable ; il faut tenir cela pour si certain et resolu, que jamais plus il n'en soit doute.

Vous m'obliges bien fort de me dire les deux motz que vous m'escrives de vos inclinations ; sur lesquel je vous dis que nos affections, pour petites qu'elles soyent, deschirent nostre ame quand elles sortent mal a propos. Tenés-les en main et n'en faites pas peu de conte, car elles valent beaucoup selon le poids du sanctuaire.

Le desir de vous esloigner des causes n'est pas a propos au train auquel nous sommes , car il fait abandonner le vray soin de combattre. Or, ce dernier nous est necessaire, tandis que le premier est impossible. Et puis, ou il n'y a pas danger de peché mortel, il ne faut pas fuir, mais vaincre tous nos ennemis et s'y opiniastrer sans perdre courage, bien que nous soyons quelquefois vaincus.

Ouy vrayement, ma chere Fille, attendés de moy tout ce que vous pouves attendre d'un vray pere, car j'ay certes bien cette affection la pour vous ; vous le connoistres au progres, si Dieu m'assiste.

Or sus donq, ma bonne Fille, vous voyla affligee comme il faut pour bien servir Dieu, car les afflictions sans abjection enflent bien souvent le cœur en lieu de l'humilier ; mais quand on a du mal sans honneur, ou que le deshonneur mesme, l'avilissement et l'abjection sont nostre mal, que d'occasions d'exercer la patience, l'humilité, la modestie et la douceur de cœur ! Le glorieux saint Paul s'esjouyt, et d'une humilité saintement glorieuse, dequoy il est, avec ses compaignons, estimé comme les ballieures et racleures du monde (1 Co 4,13).

Vous aves, ce me dites vous, encor le sentiment fort vif aux injures. Mais, ma chere Fille, cet encor a quoy se rapporte-il ? En aves vous des-ja beaucoup gasté de ces ennemis-la ? Je veux dire qu'il faut avoir courage et bonne opinion de faire mieux dores-en-avant, puisque nous ne faysons que commencer et que neanmoins nous avons desir de bien faire.

Pour vous rendre fervente en l'orayson, desirés-la bien fort, lisés volontier les loüanges de l'orayson qui sont semees en beaucoup de livres : en Grenade (Lettres 2, note 201), au commencement de Bellintani (Lettres 2, note 206) et ailleurs ; car l'appetit d'une viande fait qu'on s'entend fort a la manger.

Vous estes bien heureuse, ma Fille, de vous estre voüee a Dieu. Souvenes vous de ce que fit saint François quand son pere le mit a nud devant l'Evesque d'Assise (S.Bonavent Legend S.Franc 2) : "Maintenant donques, dit il, je pourray bien dire : Nostre Pere qui estes es cieux (Mt 6,9). " Mon pere et ma mere, dit David (Ps 26,10), m'ont abandonné , et le Seigneur m'a pris a soy.

Ne me faites point de preface pour m'escrire, car il n'est nul besoin de cela, puisque je suis avec tant de volonté dedié a vostre ame. Dieu la benisse de ses grandes benedictions et la rende toute sienne. Amen.

FRANçs, E. de Geneve.