Lettre CDLXXXIV. À la Baronne de Chantal

La fête de la Dédicace; les cœurs et les corps, temples mystiques dédiés à Dieu par les vœux. - La dévotion du Rosaire à Annecy. - La baronne de Chantal à l'hôpital de Beaune. .

Annecy, 8 octobre 1608.

Nous celebrons aujourd'huy, ma chere Fille, la Dedicace de nostre Eglise; mais, entre les Offices, je vous viens escrire cette lettre pour retourner bien tost a l'autel ou je veux, avec des particulieres affections, faire action de graces a nostre doux Sauveur de la dedicace de nos cœurs et de nos cors que par sa misericorde nous luy avons faitte par nos vœux. 0 que nous serons heureux, ma bonne chere Fille, si nos temples (1 Co 3,16) ne sont point violés ! Qu'a jamais le Saint Esprit y reside (Rm 8,11) et ne permette point qu'aucune irreverence y soit commise ; que ce soyent des maysons d'orayson (Is 56,7 ; Mt 21,13) et de priere, ou les sacrifices de'loüange, de mortification et d'amour soyent immolés (Ps 49,14 ; 115,17).

0 ma Fille, que mon cœur est plein de bons souhaitz pour le vostre ! Vous diray je bien ce sentiment ? Dimanche je fis un sermon du Rosaire, parce que je suis de cette Confrerie la il y a long tems , et presque toute cette vilette en est ; et d'autant que je voulois faire entendre a mon cher peuple pourquoy on appelloit le Chapelet Couronne, je fus contraint d'apporter le passage de saint Paul (Ph 4,1), auquel il appelle ses disciples, sa couronne : Demeurés ainsy, mes tres chers. 0 ma Fille tres chere et tres desiree, je vous laissay en l'hospital de Beaune , pleine de desir d'aymer, d'honnorer, de servir, d'adorer la volonté de Dieu, resignant en toutes choses, grandes et petites, la vostre a la misericorde de la sienne ; je vous laissay avec Nostre Seigneur reellement receu en vous mesme, et cela, entre les pauvres de Nostre Seigneur. Mon Dieu, ma chere et tres singulierement chere Fille, comme cela, vous estes et ma joye et ma couronne. Et demeurés donques ainsy, ma tres chere : demeurés de cœur et d'esprit avec nostre Sauveur, demeurés resignee a sa volonté, demeurés entre ses pauvres par affection. Et puisque sa volonté est que voussoyés encor au service et a la conduitte de vostre famille, demeurés-y en paix, avec la fidelité que vous devés a ce saint vouloir.

Je suis celuy que Nostre Seigneur veut estre tout vostre, et tout singulierement vostre.

Le 8 octobre 1608, a Neci.