Lettre DII. Exhortation à la Douceur Dans les Relations Avec le Prochain. - Comment Réprimer les Défauts de Nos Inférieurs. - Aveu du Saint. - les Vainqueurs du Mal

Quand le saint patriarche Joseph renvoya ses freres d'Egypte pour amener Jacob leur pere, il leur donna cet advis : Ne vous courroucés point en chemin (Gn 55,24). Je vous dis de mesme : Cette miserable vie n'est qu'un acheminement a la bienheureuse ; ah ! ne nous courrouçons point en chemin, allons avec nos compaignes, doucement et paisiblement. Ne recevés pas les pretextes que l'amour propre suggere pour excuser le courroux, car saint Jacques dit tout net (Jc 1,20) : L'ire de l' homme n'opere point la justice de Dieu ; combien moins celle de la femme. Et aussi, Nostre Seigneur a formé toute sa doctrine en ces motz : Apprenes de moy que je suis doux et humble de cœur (Mt 11,29).Bref, le sucre ne gaste nulle sauce. .

Il faut resister au mal et reprimer les vices de ceux qui sont en nostre charge, puissamment, vaillamment, mais doucement, paisiblement. Rien ne matte tant l'elephant que l'aigneau, et rien ne rompt tant la fureur du canon que la laine. Je ne me suis mis en cholere, pour justement que ç'ayt esté, que je n'aye reconneu par apres que j'eusse encores plus justement fait de ne me point courroucer.

Bref, resouvenés vous que l'espouse de Nostre Seigneur est appel1ee Sulamite (Ct 7,1), c'est a dire paisible, et que dessous sa langue est le lait et le miel ; en ses levres, le rayon distillant, comme il est dit au Cantique (Ct 4,11). Saint Paul nous apprend de vaincre le mal (Rm 12, 21), et non seulement de le combattre. Ceux qui se courroucent combattent le mal, mais ceux qui sont doux le vainquent: Surmontes, dit l'Apostre (Rm 12, ) le mal par le bien.