Lettre DLVIII. À M, Antoine des Hayes

Nouvelles rétrospectives d'un voyage en Bourgogne. - Pèlerinage différé. - François de Sales accusé auprès du duc de Savoie d'avoir fait une tentative pour reprendre son autorité temporelle de prince-évêque de Genève ; le fondement de cette calomnie. - Un mariage désiré. - Dévouement des amis de M. de Charmoisy pour le tirer de sa retraite. - Trois dames destinataires de l'lntroduction à la Vie devote.

Annecy, 4 décembre 1609.

Monsieur,

Ayant esté pres de deux mois entiers en Bourgoigne, partie au duché , pour assister aux noces de mon frere de Groysi, qui doit tant estre vostre serviteur, partie au comté , pour l'execution d'un commandement que le Pape avoit confié a Monsieur l'Evesque de Basle et a moy conjointement ; j'ay treuvé a mon retour la lettre que vous avies pris la peyne de m'escrire par le bon monsieur de Soulfour , qui passa a Chamberi tandis que j'estois sur mon voyage ; lettre, comme toutes les autres, pleyne des marques de ce grand et fort amour que vous me portés, et duquel je suis reciproquement amoureux de toute l'estendue de mon cœur, et autant glorieux qu'homme du monde a qui vous le sceussies departir.

Si vos affaires retardent nostre pelerinage a la Sainte Magdeleyne (note 262), il n'en sera que tant plus delicieux un'autre fois, quand vous les aures heureusement achevees comme je souhaite. Et tandis, je m'esclarciray aussi de mon costé d'un autre que j'ay treuvé a mon retour, fort inopinement, lequel (affin que je vous le die, Monsieur, a qui je voudrois estre tous-jours tout ouvert) consiste en un esclarcissement d'un ombrage que quelqu'insolent a fait par l'interposition de sa calomnie, entre l'esprit de Son Altesse et moy, comme si j'avois certaine intelligence sur ma miserable Geneve, pour y entrer et regner par autre moyen que celuy de sa grace. Le fondement du mesdisant a esté dix ou douze jours entiers que je fus a Gex. ce mois de septembre passé, et ou allant, par une certaine imprudente hardiesse, je passay tout au travers de Geneve (lettres 547, 559 et 560), apres avoir fait dire a la porte a celuy qui marchait immediatement devant moy, que j'estais Monsieur l'Evesque, et escrire en la bullette : Franç. de Sales, Evesque de ce Diocœse (car il se faut un peu estendre a dire les particularités des saillies de ma vaillance ).

Sur tout cela, donq, on a fait cet argument: Qu'a-il tant fait a Gex, et qui luy a donné cett'asseurance de passer en cette ville tant ennemie du nom quil porte et de sa qualité, et en laquelle ses praedecesseurs ne sont jamais entrés des la revolte, sans saufconduit, sans se desguiser, sans desadvoüer sa qualité ? Mais en vray (sic) verité, ilz ont peu de connoissance de mon ame, s'ilz me jugent si plein de consideration et d'apprehension que je ne puisse pas faire une petite temerité. Le tems, mon innocence, mais sur tout la providence de Dieu, accommodera tout cela : dequoy neanmoins j'ay escrit a Son Altesse tout ce quil m'en sembloit, ayant premierement sceu qu'elle s'estoit laissé porter a quelque sorte de desfiance de moy; de maniere que j'en demeure en tout bon repos. Voyla mes nouvelles d'Estat.

Quant a celles de ce pais, nous nous res-jouissons grandement en l'esperance de voir un bon fruit du voyage de monsieur de Jacob et attendons que Monsieur vienne pour passer en France, achever ce mariage que nous desirons tant et qu'on differe tant . Nostre monsieur de Charmoysi, ce pendant, est tout joyeux en sa mayson des chams et tesmoigne d'aymer tant sa retraitte quil ne veut point qu'on traitte de l'en retirer ; neanmoins, si Monsieur vient, je feray, si je puis, selon vostre conseil. Je desirerois bien y pouvoir beaucoup, comm'aussi de sçavoir, le tems estant venu, que Paris ayt un chef auquel mon cœur ayt tant d'alliance et de correspondançe d'amitié comm'il a avec vous.

J'envoye ces trois livres aucunement corrigés de tant de fautes que l'imprimeur y a laissé glisser. Je les offre a madame vostre chere moytié (note 264) et un, par son entremise, a madamoyselle de Touteville , sinon que vous en. voulussies prendre la peyne vous mesme, et un autre. a madame la Marquise de Menelay (note 265). J'auroys honte de tout cela, si vostre faveur ne devoit couvrir la nudité qui y est, comm' encor ce que j'ose vous addresser tant de lettres qui sont en ce pacquet.

NostreSeigneur vous conserve, Monsieur, et vous comble de tout bonheur; c'est le continuel souhait de

Vostre tres affectionné et tres fidelle serviteur,

FRANÇ., E. de Geneve.

4 decembre 1609, a Neci.

Monsieur, c'est a vous a qui j'escris ainsy librement de mes nouvelles.

A Monsieur

Monsieur des Hayes,

Maistre d'hostel du Roy,

Gouverneur et Baillif de Montargis.

Revu sur l'Autographe conservé au presbytère de Gex.