Lettre DLXIV. À Madame de la Fléchère

L'unique guérison de certaines épreuves spirituelles. - Le sang du Calvaire et la clarté du Thabor : de ces deux montagnes, quelle est la plus désirable et la plus fructueuse. - Le pain sans sucre et le sucre sans pain..- Pourquoi la connaissance de notre néant ne doit pas nous troubler.

[1609 ou 1610]

Certes, ma chere Fille, ce n'est pas que je n'aye un cœur tout tendre pour vous, mais je suis tellement tracassé d'encombriers, que je ne puis pas escrire quand je veux. Et puis, vostre mal, qui n'est d'autre chose que de secheresse et aridité, ne peut estre remedié par lettre ; il faut en presence ouyr vos petitz accidens, et encor, apres tout, la patience et resignation en est l'unique guerison. Apres l'hiver de ces froidures, le saint esté arrivera et nous serons consolés.

Helas ! ma Fille, nous sommes tous-jours affectionnés a la douceur, suavité et delicieuse consolation ; mais toutefois, l'aspreté de la secheresse est plus fructueuse. Et quoy que saint Pierre aymast la montaigne de Thabor (Mt 17,4) et fuist la montaigne de Calvaire, celle ci toutefois ne laisse pas d'estre plus utile que celle la, et le sang qui est respandu en l'une, est plus desirable que la clairté qui est respandue en l'autre. Nostre Seigneur vous traitte des-ja en brave fille ; vivés aussi un peu comme cela. Mieux vaut manger le pain sans sucre que le sucre sans pain.

L'inquietude et chagrin qui vous arrive de la connoissance de vostre neantise n'est pas aymable ; car encor que la cause en est bonne, l'effect neanmoins ne l'est pas (Lettres 3, lettre 341). Non, ma Fille, car cette connoissance de nostre neantise ne nous doit pas troubler, ains adoucir, humilier et abbaisser ; c'est l'amour propre qui fait que nous nous impatientons de nous voir vilz et abjectz. Or sus, je vous conjure par nostre commun amour, qui est Jesus Christ, que vous vivies toute consolee et toute tranquille en vos infirmités. Je me glorifie en mes infirmités, dit nostre grand saint Paul (2 Co 12,9), affin que la vertu de mon Sauveur habite en moy. Ouy, car nostre misere sert de throsne pour faire reconnoistre la bonté souveraine de Nostre Seigneur.

Je vous souhaitte mille benedictions. 0 Seigneur, benissés le cœur de ma tres chere Fille, faites-le brusler comme un holocauste de suavité a l'honneur de vostre divine dilection ; qu'elle ne cherche aucun autre contentement que le vostre, ne requiere autre consolation que celle d'estre tres parfaittement consacree a vostre gloire. Jesus soit a jamais au milieu de ce cœur et que ce cœur soit a jamais au milieu de Jesus ; Jesus vive en ce cœur et ce cœur en Jesus.

Je suis en luy, plus vostre que vous ne sçauriés croire, ma chere Fille.

Vostre tres affectionné serviteur,

FRANÇs, E. de Geneve.