Lettre DLXVII. Au Duc de Savoie, Charles-Emmanuel 1er

(MINUTE)

Sainteté du bienheureux Amédée. - Estime qu'on en fait en Savoie. - C'est un devoir pour le duc de désirer la canonisation d'un tel ancêtre et de s'employer à l'obtenir.

Annecy, [janvier 1610 ]

Monseigneur,

Il y a quelque tems que j'envoyay a Vostre Altesse Serenissime plusieurs memoires (lettre 548) touchant l'estime et veritable opinion que tout ce païs de deça avoit tous-jours euë de la sainteté du bienheureux Duc Amedee troisiesme ; et je croyois que Vostre Altesse, considerant ces honnorables tesmoignages de l'eminente sainteté d'un Prince auquel elle appartient de si pres, seroit suffisamment incitee a en desirer la canonisation. Mais attendant de jour a autre qu'on fist quelque bon dessein pour cela et n'ayant point de telles nouvelles, je supplie tres humblement Vostre Altesse de me pardonner si, avec un peu de chaleur, je luy represente ma pensee sur ce sujet: car en une grande affection on ne se peut pas bien. retenir.

Ce grand Saint et Vostre Altesse aves un devoir mutuell'un a l'autre ; car Vostre Altesse luy succedant, et selon le mesme sang et selon le mesme sceptre, elle luy appartient comme un filz a son pere. Vostre Altesse donq le doit honnorer en tout ce qu'elle peut, comme sa charité l'oblige de proteger, secourir et eslever Vostre Altesse. Ni ces liens reciproques ne sont point rompus par la mort, car ce sont des liens de l'amour sacré, qui est aussi fort pour les conserver que la mort pour les dissoudre (Ct ult,6).

Or, les miracles que Dieu a faitz en faveur de ce grand Prince, la grande estime de la sainteté d'iceluy que sa divine Providence a nourrie dans le cœur des peuples qui ont le bonheur d'estre sous sa couronne et de plusieurs autres circonvoysins, les histoires qui celebrent si hautement la pieté de sa vie , ce sont, Monseigneur, tout autant de sommations que ce saint Prince vous fait de luy faire les honneurs qui sont dus a son excellente sainteté. Nul ne luy a ce devoir en pareil degré avec Vostre Altesse, nul n'a le pouvoir si grand de le luy rendre, ni, par consequent, nul n'en doit avoir un vouloir si ardent.

Je prie Dieu qu'il comble de celestes benedictions Vostre Altesse, de laquelle je suis infiniment,

Monseigneur,

Tres humble, tres obeissant et tres fidelle

orateur et serviteur,

FRANÇs, E. de Geneve.