Lettre DLXXVII. À Madame de Cornillon, sa Soeur

Heureuse fin de Mme de Boisy. - Une promesse mutuelle. - Les regrets dans les séparations. - Paix joyeuse de la mère du Saint.

Sales, 4 mars 1610

Ma tres chere Seur, ma Fille,

Consolons nous le plus que nous pourrons en ce trespas de nostre bonne mere, car les graces que Dieu a exercees en son endroit pour la disposer a une heureuse fin, sont des marques fort certaines que son ame est doucement receuë entre les bras de sa divine misericorde ; si que elle est bienheureuse d'estre desprise et demeslee des travaux de ce monde . Et nous aussi, chere Seur, serons bienheureux a nostre tour si, comme elle, nous vivons le reste de nos jours en la crainte et amour de Nostre Seigneur, ainsy que nous le nous sommes promis l'un a l'autre, l'autre jour a Neci (lettre 572). Sa divine Majesté nous attire en cette sorte au desir du Ciel, y retirant petit a petit tout ce qui nous estoit plus cher icy bas.

Soyés donq bien consolee, ma chere Fille, et si vostre cœur ne peut s'empescher d'avoir du ressentiment en cette separation, faites au moins qu'il soit tellement moderé par l'acquiescement que nous devons au bon playsir de nostre Sauveur, que sa Bonté n'en soit point offensee, ni le fruit qu'il a mis en vostre ventre, malmené.

Encor faut-il que je vous die ce mot pour vostre contentement : c'est que cette pauvre bonne mere, avant que de partir de Neci, revit tout l'estat de sa conscience, renouvella toutes les bonnes resolutions qu'elle avoit faites de servir Dieu et vint si contente de moy que rien plus ; car Dieu ne voulut pas qu'elle fust en estat de melancholie quand il la prendroit a soy.

Or sus, ma chere Seur, ma Fille, aymés moy tousjours bien, car je suis plus vostre que jamais. Et pleust a Dieu que vous peussies venir faire la sainte Semaine avec nous ! je m'en sentirois fort consolé. Bon jour, ma Fille; je suis

Vostre frere et serviteur tres affectionné,

FRANçs, E. de Geneve.

Le 4 mars 1610.