Lettre DXCIV. À la Baronne de Cusy

Une postulante que le monde dispute à la vie religieuse. - Qu'elle sonde son cœur avant d'embrasser Jésus-Christ crucifié; ce dessein demande une âme vaillante et généreuse. - Encouragements à prendre un parti décisif. - Le Saint promet de s'employer avec joie et constance à la "sainte besoigne " de la future Congrégation.

Annecy, 2 mai 1610.

Madame,

A ce passage de M. le Baron vostre mari, j'ay sceu avec combien d'artifices le monde s'estoit essayé d'esbransler vostre resolution touchant vostre retraitte (lettre 591), et ay loüé Nostre Seigneur dequoy vous aves conservé vostre fermeté jusques a present. Neanmoins, maintenant que nous sommes, ce me semble, a la veille de l'execution d'une si sainte entreprise , il faut que je vous parle un peu ouvertement, et que je vous conjure de bien espreuver vostre cœur pour reconnoistre si vous aures asses d'affection, de force et de courage pour embrasser ainsy absolument Jesus Christ crucifié et donner les derniers adieux a ce miserable monde. Car voyes vous, Madame, il est requis que vous ayes une ame vaillante et genereuse pour entrer en ce dessein, affin que vous resisties aux suggestions que la folle sagesse du monde (1 Co 1,20) vous fera.

Il est vray que si vous entreprenés cette œuvre simplement pour Dieu et vostre salut, vous y aures tant de consolations que rien ne vous sçauroit destourner, et la bonne compaignie en laquelle vous seres ne vous servira pas de peu a vous bien establir ; mais il ne faut pour cela que vous laissies de bien examiner vostre courage avant que de venir. Que si vous le treuvés bon et ferme, venés donq hardiment au nom de Dieu, lequel, s'estant rendu autheur et protecteur de ce projet, le favorisera de plus en plus de ses benedictions et vous y donnera mille consolations que le monde ne peut sçavoir. Si, au contraire (ce que Dieu ne veuille), vous ne vous senties pas asses forte pour entrer en ce chemin, il seroit bien bon de nous en advertir, affin que les autres commençassent selon leur inviolable desir, et vous, Madame, pensassies a prendre quelque autre sorte de vie plus a vostre gré .

Pour moy, j'ay tellement cette sainte besoigne en recommandation, que je me sentiray bienheureux de pouvoir m'employer a son advancement, et y serviray constamment, joyeusement et, Dieu aydant, utilement ; mais avec tant d'affection, que rien ne m'en sçauroit destourner sinon la seule volonté de Dieu , lequel peut estre, pour mes pechés ne me treuvera pas digne de faire ce service a sa gloire.

J'espere en luy que vostre esprit accroistra de bien en mieux, et le suppliant qu'il vous console et prepare, je demeureray,

Madame,

Vostre tres humble serviteur,

FRANÇs, E. de Geneve.

D'Annessi, ce 2 may 1610.

Revu sur le texte inséré dans l'Histoire manuscrite de la Fondation du 1er Monastère de la Visitation d'Annecy.