Lettre DXCVIII. À M. Roch Calcagni

Titres et aptitudes de M. de la Thuille, frère du Saint, à remplir la charge de chevalier pour laquelle il est proposé. - Le destinataire est prié de remettre des lettres pour faire aboutir la nomination.

Annecy, 8 mai 1610

Monsieur,

Estant icy de retour , j'ay treuvé le bon monsieur de Monthou mort , et mon frere, le sieur de la Thuille, nommé par le Conseil a Monseigneur (le Duc de Nemours) pour estre prouveu de l'estat de chevallier, nomination a laquelle ni mondit frere ni moy n'avions seulement pas pensé , Mais la voyant faitte, j'ay creu que je devois au bien de mondit frere une tres humble supplication a Son Excellence, affin quil luy playse de nous gratifier de cet honneur, lequel est certes plus grand que nous ne meritons, mais qui ne peut tumber en une personne plus fidelle au service de Son Excellence que mon dit frere sera ; a quoy j'adjouste que l'estude quil a fait asses fructueusement en droit, pourra encor le rendre moins inutile en cette place, si Dieu et Monseigneur l'y conduisent.

La lettre donq cijointe est pour ce sujet, et celle qui est addressee a monsieur Desfrenes aussi , qui me fait vous supplier de la rendre le plus tost quil vous sera possible, et comme pour l'amy ; car encor que nous ne vous ayons jamais rendu aucun service qui nous puisse acquerir cette qualité, si avons nous bien eu ce desir, et moy particulierement, qui, priant Nostre Seigneur quil vous conserve et accompaigne, suis,

Monsieur,

Vostre serviteur tres affectionné,

FRANÇs, Evesque de Geneve.

XVIII may 1610, Annessi.

A Monsieur

Monsieur Roc Calcanie,

Escuyer de la grande escurie de S. E.

Revu sur l'Autographe appartenant à M. le comte Morandi, à Plaisance.