Lettre MDXCI. À la Mère de Chantal, a Paris

L'Evêque de Genève roi de la fève à la Visitation d'Annecy. - Préparation à un " renouvellement extraordinaire ". - Bonne correction à une âme opiniâtre. - Science acquise à la cour par Jean-François de Sales; honneurs qu'il y reçoit. - Protecteur d'année ; pourquoi le Saint aime la pauvreté.

Annecy, 8 janvier 1620.

0 ma tres chere Mere, Dieu par sa bonté soit a jamais au milieu de nostre cœur, pour y vivre et regner selon son bon playsir.

Que diray je a ce commencement d'annee ? Je suis roy de bon jeu en vostre Mayson, et nos Seurs en sont fort contentes, et m'ont envoyé par escrit une grande protestation de leur sousmission et obeyssance, et m'ont demandé quelques nouvelles loix selon lesquelles elles vivront ; et je les mediteray pour leur en porter quand je pourray leur faire une exhortation, que je m'essayeray de faire dans cette octave le plus gratieusement que je sçauray, car j'ay des-ja une idee aggreable pour cela .

Sur le commencement de la semaine qui vient, je feray ma reveuê pour un renouvellement extraordinaire que Nostre Seigneur m'invite de faire, affin qu'a mesure que ces annees perissables passent, je me prepare aux eternelles ( note 168 ).

La Seur N. nous a donné de l'exercice et ne veut encor pas cesser ; car elle a un moule a part, auquel elle fait des pechés mortelz, et opiniastre qu'elle ne peut se communier pour cette occasion . Je luy fis une bonne correction, avec autant de vinaigre que d'huyle, que je repeteray, en changeant les motz, si souvent, qu'elle operera moyennant la grace de Dieu. Tout le reste va bien ; sur tout les jeunes sont gratieuses .

Monsieur [de Boisy ] est tous-jours a la cour, ou il apprend la mortification de la propre volonté, excellemment, et encor plus celle de l'impatience, activité et soudaineté, car il faut demeurer trois heures et quatre a attendre les heures du service ; beaucoup plus, certes, que quand il treuvoit quelqu'un a l'autel de la Visitation. Mais au reste, c'est la verité qu'il fait des merveilles ; et non seulement nostre chere Madame, mais Son Altesse et tous les Princes et Princesses, seigneurs et dames le cherissent et l'estiment grandement ; et des maintenant, sans que j'en aye parlé en sorte quelconque, on le va jetter dans la coadjutorerie, si Madame est de croire, affin que son premier Aumosnier soit Evesque .

O ma Mere, soit que la providence de Dieu me face changer de sejour, soit qu'elle me laisse icy (car cela m'est tout un), ne seray-je pas mieux de n'avoir pas tant de charge, affin que je puisse un peu respirer en la Croix de Nostre Seigneur et escrire quelque chose a sa gloire ?

Mon Saint, c'est saint François, avec l'amour de la pauvreté ; mays je ne sçai comme l'aymer cette aymable pauvreté, car je ne la vis jamais de bien pres : neanmoins, en ayant ouy dire tant de bien a Nostre Seigneur, avec lequel elle nasquit, vescut, fut crucifiee et resuscita, je l'ayme et l'honnore infiniment.

VIVE JESUS !

FRANÇS, E. de Geneve.

Le 8 de janvier 1620.