Lettre MDCXI. À Madame de Granieu

Deux mots seulement à la destinataire, pour avoir le temps d'écrire à d'autres. - Humilité et patience. - M. de Boisy, évêque. - A quoi François de Sales emploiera son loisir.

Annecy, 17 février 1620.

A vous, ma tres chere Fille, il ne faut point de ceremonie, car Dieu ayant rendu mon cœur si fortement serré au vostre, il n'y a plus d'entredeux, ce me semble. C'est pour vous dire que je ne vous escris que ces deux motz, reservant le loysir pour escrire a d'autres a qui il faut faire responce ( lettre 1612 ).

Mais que sont ilz ces deux motz ? Humilité et patience. Ouy, ma tres chere Fille, et tous-jours, certes, plus chere Fille. Vous estes environnee de croix tandis que le cher mary a du mal : or, l'amour sacré vous apprendra qu'a l'imitation du grand Amant, il faut estre en la croix avec humilité, comme indigne d'endurer quelque chose pour Celuy qui a tant enduré pour nous, et avec patience, pour ne point vouloir descendre de la croix qu'apres la mort, si ainsy il plait au Pere eternel. O ma tres chere Fille, recommandes moy a ce divin Amour crucifié et crucifiant, affin qu'il crucifie mon amour et toutes mes passions, en sorte que je n'ayme plus que Celuy qui, pour l'amour de nostre amour, a voulu estre douloureusement mais amoureusement crucifié.

Mon frere de Boysi, vostre hoste , s'en va estre evesque pour me succeder, Madame l'ayant ainsy desiré et Son Altesse voulu, sans que jamais, ni directement ni indirectement, je l'aye recherché. Cela me fait esperer un peu de repos pour escrire encor je ne sçay quoy du divin Amant et de son amour , et pour me preparer a l'eternité.

Ma tres chere Fille, je suis incomparablement vostre serviteur tres humble, et de monsieur vostre mary, et de monsieur C. , mais sur tout de vostre chere ame, que Dieu benisse. Amen.

FRANçs, E. de Geneve.

Le 17 febvrier 1620.