Lettre MDCLXXIV. À Madame Angélique Arnauld, Abbesse de Port-Royal a Maubuisson

M. Michel député pour une visite. - Il n'y a rien à craindre des misères spirituelles non aimées. - Une fille du monastère de la croix et volonté de Dieu.

Annecy, 5-7 juillet 1620 .

Ce n'est pas escrire que d'escrire si peu, ma tres chere Fille ; mais c'est pourtant faire en partie ce que l'on doit quand on fait ce que l'on peut. J'ay dit a M. Michel Favre, mon assistant continuel, que s'il se pouvoit, il vous allast voir de ma part ; car si je pouvois, j'irois moy mesme et m'en estimerois plus heureux, ayant tous-jours une tres singuliere complaysance et consolation a seulement penser que vous estes ma tres plus chere fille. Et imagines vous que M. [de Belley ( note 648 )] ayant demeuré icy huit jours, ce n'a pas esté sans faire mention de vous, mais non pas certes asses selon mon gré.

Or, je ne crains point toutes ces miseres dont vous m'escrives que vous estes accablee, tandis que, comme vous faites et feres tous-jours, vous ne les aymeres pas et ne les nourrires pas ; car petit a petit vostre esprit se fortifiera contre vostre sens, la grace contre la nature et vos resolutions sacrees contre vos indignations. Envoyes moy bien de vos nouvelles, ma tres chere Fille, et ne vous mettes point en des pensees pour me faire des exhortations a ne point m'incommoder pour vous respondre ; car je vous asseure que je ne m'incommode point, ains je m'accommode grandement quand le loysir me le permet. A la premiere occasion, j'escriray a la chere seur Catherine de Gennes , qui m'est, je vous asseure, toute cherement chere. La pauvre fille, helas ! elle est du vray monastere de la croix et volonté de Dieu.

Ma tres chere Fille, Dieu m'a rendu vostre, et je le seray invariablement a jamais et tout a fait sans reserve ; il est vray, ma tres chere Fille, je le suis plus qu'il ne se peut dire.

FRANçs, E. de Geneve.