Lettre MCLVI. Au Duc de Bellegarde

Vicissitude des années et permanence des affections formées par Dieu. - Les enfants pensent souvent à leurs pères ; les pères pensent toujours à leurs enfants. - L'alcyon sur les ondes.

Annecy, 6 janvier 1616.

Monsieur,

A ce commencement de nouvelle annee, je vous represente mes vœux et mon obeissance, dissemblables certes aux ans, en ce quilz perissent tous dans leurs vicissitudes et revolutions ; mais l'infinie affection que j'ay a vostre gloire est ferme, permanente et exempte de tout autre changement que de celuy de sa continuelle croissance. Aussi fut elle formee de la main eternelle de Dieu, a mesme que la bienveuillance que vous aves pour moy fut creee en vostre esprit ; et si, elle ne regarde aussi que l'eternité. Passion toute miraculeuse, qui, au dessus des loix de la nature, m'a donné le bien de vous avoir pour filz, et a vous, Monsieur, le courage et l'humilité de m'advouer pour pere.

0 combien de foys, Monsieur mon cher Filz, ce nom et ce cœur de pere que je porte envers vous me presse-il d'amour et de zele pour supplier la divine Bonté qui l'a volu comme cela, de combler vostre ame de sa sainte dilection, establissant son royaume celeste en vous ! Je le sçai bien que les bons enfans pensent souvent en leurs peres ; mays ce n'est pas souvent, c'est tous-jours que les peres ont leurs espritz en leurs enfans.

Perseveres, Monsieur mon tres cher Filz, en cette grandeur de courage qui vous tient relevé au dessus des choses temporelles, entre lesquelles vous passes comme un heureux alcyon ( IVD 3,14 ; L3, note 170 ) surnageant aux ondes qui inondent ce siecle. Tenes vos yeux arrestés a cette sainte eternité a laquelle nous allons par la course de ces annees, qui, passant, nous passent comme de poste en poste, jusques a cette fin-la. En ces momens, pourtant, comme dans un petit noyau, est enclose la semence de toute l'aeternité, et en ces menus travaux de la devotion que nous devons prattiquer est enfermé le prix de l'infinité de la gloire ( 2 Co 4,17 ), et ce petit soin de servir Dieu produit le repos d'une joye perdurable. Qu'a jamais le sang du Sauveur soit beni, qui nous a rendu le salut si aysé !

Il ne se peut dire, Monsieur mon Filz, combien j'ay de consolation de sçavoir que monsieur vostre frere, ce digne et brave seigneur qui vous tient lieu de cher enfant, est enfin marié ; car je ne doute point que cela ne luy soit un grand moyen pour bien servir Dieu, a quoy il est asses porté par la generosité de son courage, outre que je m'imagine que vostre contentement, Monsieur, en est grand. Et si Dieu exauce mes souhaitz, ce mariage sera fleurissant en toute sorte de benedictions, et rendra en son tems les fruitz ( Ps 1,3 ) d'une desirable et belle posterité. De faire des amas de paroles sur ce sentiment pour en tesmoigner la grandeur, je n'en ay pas l'art, principalement escrivant avec ce cœur tout de bonne foy, a Vostre Grandeur, qui se contente de la realité de mon affection. Mays, ce pendant, j'excede en longueur.

Vives a jamais en Dieu et pour Dieu, Monsieur, et aymes constamment

Vostre tres humble et obeissant serviteur,

FRANÇs, E. de Geneve.

6 janvier 1616, Annessi.

A Monsieur [Monsieur le Duc de] Bellegarde;

Marquis de Seurre et Versoix,

Chevalier des deux Ordres du Roy, grand Escuyer de France

Gouverneur de Bourgoigne, Bresse et Beugey.

Revu sur l'Autographe conservé à la Visitation de Saint-Céré.