Lettre MCCLXIX. Au Chanoine Denis de Granier

(INÉDITE)

Le destinataire est prié de vouloir bien résigner sa place de chanoine en faveur d'un digne ecclésiastique .

Annecy, 5 janvier 1617.

Monsieur,

Sur la vacance d'un canonicat de nostre Eglise, au (sic) voys du Chapitre se sont presentés deux personnages ………., l'un et l'autre desirés de cette compaignie ; et apres l'election faite en faveur de l'un , il est resté audit Chapitre un grand desir de pouvoir encor avoir l'autre, pour les bonnes qualités qui sont en luy . Sur quoy, quelques-uns se sont advisés que vous avies une place, laquelle vous estes resolu de ne vouloir point remplir de vostre personne, ainsy que vous l'aves declaré, et que le tems escoulé des l'impetration d'icelle fait asses connoistre. Et pour cela, ilz se sont addressés a moy, affin que, tant au nom dudit Chapitre qu'au mien, je vous priasse de là remettre a ce digne ecc1esiastique, qui estant de bonne vie, docteur es droitz et en theologie, sera grandement utile a cett'Eglise.

Or, je croy que vous ne douteres pas que sil vous playsoit de la garder et nous faire jouir du fruit de vostre residence, nous ne le souhaitassions plus que toute autre chose; mays puisque elle vous est tout a fait inutile, et a l'Eglise, presupposé la resolution que vous aves faite, je pense que vous treuveres bon nostre desir et le seconderes, comme juste quil est, selon Dieu et les loix. Je sçai que vous avies eü intention d'en gratifier le frere de monsieur Greffiez , auquel je ne voudrois en rien praejudicier, ains l'ayder et servir de mon pouvoir. Mays n'y ayant nulle apparence de faire reuscir sa praetention de ce costé la, je ne pense pas que cela vous doive plus arrester de nous donner, au lieu de vous que nous desirions (sic) plus que tous, quelqu'un qui, en quelque sorte, vous puisse dignement representer : dequoy donq je vous prie avec tout ce venerable Chapitre, ne doutant point que, selon vostre prudence, zele et pieté, vous ne vous disposies a suivre nos desirs.

Atant, je me recommande a vos prieres, vous asseurant que de tout mon cœur je seray tous-jours,

Monsieur,

Vostre plus humble, tres affectionné confrere,

FRANÇs, E. de Geneve.

Monsieur, en cas que vous facies ce que nous demandons, il ne sera besoin sinon de faire la resignation en mes mains, c'est a dire une procure ( pour résigner purement et simplement ) ad resignandum pure et simpliciter entre mes mains, ou de mon Vicaire general ; car par apres, le moys qui vient, auquel je suis en mon alternative , je prouvoirois celuy dont il est question, qui s'appelle monsieur Questan, bourgeois de cette ville .

Veille des Roys 1617.

A Monsieur

Monsieur [de Granier, Docteur] en theologie

…..., ville.

Revu sur l'Autographe conservé au 2e Monastère de la Visitation de Marseille.