Lettre MCCC. À la Comtesse de San Secondo

A quelles âmes François de Sales dédiait volontiers son service. - Envoi des Règles de la Visitation. - Une instance en Cour de Rome. - Assurance de prières pour la Maison de Savoie.

Annecy, 25 avril 1617.

Madame,

Bien que je n'aye pas le bonheur d'estre conneu de vous, si est ce que je ne laisse pas de reconnoistre en vous les qualités par lesquelles vous merites d'estre honnoree de tous ceux qui font profession de l'honneur ; dequoy madame la Baronne de Giez, ma cousine, se rendra, je m'asseure bien, ma caution . Mays, laissons cela a part.

Le sujet de vostre lettre, qu'il vous a pleu de m'escrire, me tesmoigne asses que vous aves dedié vostre amour a Dieu; et que faut-il davantage pour m'obliger a vous dedier mon service ? Je le fay donq certes de tout mon cœur, et a madame la signora Donna Genevra , benissant la bonté souveraine de Nostre Seigneur qui, par ses celestes attraitz, vous a donné de si desirables affections.

Or, voyla les Regles de la Visitation, es quelles nean moins on n'a pas estendu les derniers articles ( Depuis j'ay fait suppleer par addition ce qui manquait ), par ce qu'ilz comprennent des formulaires asses longs et qui ne regardent pas tant les actions communes des Seurs, comme les particulieres des formes et ceremonies dont on use en leurs receptions seulement. Mays si vous les desirés encores, je vous les envoyeray au premier advis que vous m'en feres donner, comm'encor les prattiques des Regles, qui est une besoigne a part ; bien qu'apres tout cela, il faut que vous sachies que les Regles sont a Rome, ou l'on sollicite pour reduire cette Congregation en Religion. Et peut estre que Sa Sainteté y fera adjouster quelque chose ; ce que je ne pense toutefois pas devoir estre chose d'importance, puisque, comme nous escrit celuy qui a l'affaire en main , il ny a point d'autre difficulté sinon pour le regard de l'Office, que les messieurs qui ont l'intendance de cela veulent estre le grand Office du Breviaire; et nous desirerions que cette Congregation ne fut obligee qu'au petit Office, affin qu'elle continuast a le chanter avec la gravité, distinction, tranquillité et, pour le dire en un mot, avec la sainteté que ces ames le prononcent maintenant . Et pour obtenir cette grace, nous employons la faveur de monsieur l'Ambassadeur qui, avec le nom de Madame la Serenissime Infante , fera a mon advis reuscir heureusement l'affaire ; en quoy la signora Donna Genevra n'a pas peu de credit .

Cependant, vivés et l'une et l'autre toutes en Dieu, hors lequel la vie est une mort, et auquel la mort est une heureuse vie. Que si vous me faites la faveur de demander a sa divine Majesté une pareille grace pour moy, ce sera m'obliger de plus en plus a vouloir estre pour jamais, Madame,

Vostre plus humble, tres affectionné serviteur

en Nostre Seigneur,

FRANÇs, E. de Geneve.

Annessi, le xxv avril 1617.

Quand il en sera tems, Madame, j'escriray a Monseigneur le Prince , pour la prosperité duquel, et de toute la Mayson , nous faysons des speciales et continuelles prieres, tant publiques que particulieres: en quoy nous obeissons avec anticipation de sousmission aux desirs des Serenissimes Infantes .

Madame de Bressieu, qui est la , m'a fait grandement presser d'envoyer ces Regles ; c'est pourquoy je n'ay pas pris le loysir de les faire mieux escrire, dont je vous supplie de m'excuser.

Revu sur l'Autographe conservé à la Visitation de Pignerol.