Lettre MCCCI. À la Présidente le Blanc de Mjons

Agir et parler sans regard sur le qu'en dira-t-on. - Est-ce hypocrisie " de ne pas faire si bien que l'on parle ? " - Marcher " par le milieu des belles vertus, " et non " par les extremités " des subtilités. - Différents conseils sur quelques points particuliers et sur l'oraison. - La vocation de Mlle de Gérard. - Pourquoi les livres du Saint "ont treuvé de l'acces " en l'esprit de la Présidente. - Salutations à plusieurs dames de Grenoble. - Une triste affaire. - Folie des enfants du monde.

Annecy, 26 avril 1617.

Je respons a vostre lettre du 14, ma tres chere Fille.

1. Dites a cette chere Barbe Marie , qui m'ayme tant et que j'ayme encor plus, qu'elle parle librement de Dieu par tout ou elle pensera que cela soit utile, renonçant de bon cœur a tout ce que ceux qui l'escoutent peuvent penser ou dire d'elle. En un mot, je luy ay des-ja dit quil ne faut rien faire ni rien dire pour en estre loüé, ni laisser aussi de rien faire ou rien dire crainte d'estre loüé. Et ce n'est pas estre hipocrite de ne faire pas si bien que l'on parle, car, Seigneur Dieu ! a quoy en serions nous ? Il faudroit donq que je me teusse, de peur d'estre hipocrite, puisque si je parlois de la perfection il s'ensuivroit que je penserois estre parfait. Non certes, ma tres chere Fille, je ne pense pas estre parfait parlant de la perfection, non plus que je ne pense pas estre Italien parlant italien ; mais je pense sçavoir le langage de la perfection, l'ayant appris de ceux avec qui j'ay conversé qui le parloyent.

2. Dites luy qu'elle poudre ses cheveux, puisque son intention est droite ; car les cogitations qui viennent sur cela ne sont nullement considerables. Il ne faut pas entortiller vostre esprit parmi ces toiles d'araignee. Les cheveux de l'esprit de cette fille sont encor plus deliés que ceux de sa teste, et c'est pourquoy elle s'en embarasse. Il ne faut pas estre si pointilleuse, ni s'amuser a tant de repliques ausquelles Nostre Seigneur n'a point d'egard. Dites luy donq qu'elle marche a la bonne foy, par le milieu des belles vertus de la simplicité et humilité, et non par les extremités de tant de subtilités de discours et de considerations. Qu'elle poudre hardiment sa teste, car les faysans gentilz poudrent bien leurs pennages, de peur que les poux ne s'y engendrent.

3. Qu'elle ne perde pas le sermon ou quelque bonne œuvre faute de dire : Despechés ! mais qu'elle le die doucement et tranquillement (note 910). Si ell'est a table et le Saint Sacrement passe, qu'elle l'accompaigne en esprit, si il y a d'autres gens a table avec elle. Sil ny a personne, qu'elle l'accompaigne, si, sans s'empresser, elle peut y estre asses tost ; et puis, qu'elle retourne doucement prendre sa refection, car Nostre Seigneur ne vouloit pas mesme que Marthe le servit avec empressement ( Lc 10,40 ).

4. Je luy ay dit qu'elle pouvoit parler fortement et resolument, es occasions ou il est requis, pour retenir en devoir la personne qu'elle sçait ; mays que la force estoit plus forte quand ell'estoit tranquille et qu'on la faysoit naistre de la rayson, sans meslange de passion.

5. La Societé des Douze ne sçauroit estre mauvaise, car l'exercice duquel elle se sert est bon ; mays il faut que cette Barbe Marie, qui ne veut point de peut estre, soufre celuy ci : que, peut estre, cette Societé est veritable, car n'estant nullement tesmoignee par aucun Praelat, ni aucune personne digne de foy, nous ne sçaurions estre asseuree (sic) qu'elle ayt esté instituee, le livret qui le dit n'alleguant ni autheur, ni tesmoin qui en asseure . Ce qui ne peut nuire et peut proffiter est neanmoins bon.

6. Qu'elle marche en l'orayson, ou par pointz, comme nous avions dit, ou selon son accoustumee, il importe peu ; ains nous nous souvenons bien que nous luy dismes que seulement elle praeparast les pointz et s'essayat, au commencement de l'orayson, de les savourer ; et si elle les savoure, c'est signe que Dieu veut qu'elle suive cette methode, au moins alhors. Que si neanmoins la douce presence accoustumee l'occupait par apres, elle s'y laissast aller, et aux colloques aussi qu'elle fait par Dieu mesme, qui sont bons en la sorte qu'elle me les represente en vostre lettre ; mays pourtant, il faut aussi quelquefois parler a ce grand Tout, comme voulant que nostre rien face quelque chose. Or, puisque vous lises nos livres, je n'adjousteray rien, sinon que vous aillies simplement, rondement, franchement, et avec la naifveté des enfans, tantost entre les bras du Pere celeste, tantost tenue par sa main.

7. Quant a Mlle de Gerard ou Reautier , sil y a apparence qu'on puisse eriger une Mayson par dela (à Grenoble. ), il la faut faire venir icy, car il y aura plus de facilité de la renvoyer; si moins, je persevere qu'elle suive sa premiere visee . Mais au premier cas, je vous laisseray mesnager l'affaire pour Lyon, non pas envers ma Seur Favre , qui sera tous-jours contente de ce que nous ferons, estant si grandement nostre fille et seur comme ell' est ; mais ailleurs, a Lion, ou vous sçaves . Or, de ceci faites en la responce a Mme de Boqueron , sil vous plait, en cas que je ne puisse pas luy escrire, car je suis fort pressé, certes, et par consequent ne sçaurois escrire a Mme de Saint André pour ce coup. Si vous luy faites voir la copie de ce que j'escrivoys a Mme de Vicillieu , cela suffiroit pour un tems.

Je suis bien ayse que mes livres ont treuvé de l'acces en vostre esprit, qui estoit si brave que de croire quil se suffisoit a soymesme ; mays ce sont les livres du Pere, et du cœur duquel vous estes la chere fille, puisque ainsy a-il pleu a Dieu, auquel soit a jamais honneur et gloire.

Je n'escris donq a personne qu'a vous, mais je desire bien pourtant que, par vostre entremise, je puisse saluer madame de Saint André et madame de Virieu , que vous cherisses si ardemment. Et puis, madame Odeyer , qui m'a bien escrit une lettre fort devote, dont je suis bien consolé, car je luy souhaite beaucoup de bonheur spirituel; et madame de Boqueron, et puis en fin la bonne mere , et nostre bon M. d'Urme, que mon ame honnore et ayme parfaitement .

J'envoyeray les Regles de la Visitation au premier jour; je les avoys fait des-ja transcrire, mais il les faut envoyer a Thurin, ou l'on pense a l'erection d'une Mayson puissamment (note 933).

Le President qui a tué sa femme estoit un bon homme, mais cholere ; l'Abbé qui a esté blessé n'estoit pas prestre, ni ordonnées Ordres sacrés, mais possedoit le benefice de son abaye, pour estre de grande mayson . On dispute qui avoit le tort ; helas ! je les regrette tous, car je pense quil l'avoit (sic) tous. O que les enfans du monde sont sages ! ce dit on. O quilz sont folz ! ce dit Dieu. Bienheureux sont les enfans de Dieu, car ilz l'ayment et sont aymés de luy.

Annessi, le XXVI avril 1617.

A Madame

Madame la Presidente de Mions.

Revu sur l'Autographe conservé à la Visitation de Chambéry.