Lettre MCDXCIII. À un Ecclésiastique

Le mot du plus franc amour selon la nature et la grâce. - Assaut d'humilité et d'affection .

[1618 ]

Monsieur,

Je vous ay tesmoigné par mes lettres que je prendrois a faveur de me nommer vostre frere, qui est le mot du plus franc et desirable amour de tous ceux que la nature nous a donné et que la grace nous ordonne. Mays quand je parle avec vous sous ce tiltre de frere, c'est avec un tres singulier sentiment de fraternité ; et toutefois, vous me demandes encor que je sois vostre pere et que vous soyes mon filz. Certes, je ne sçaurois refuser mon consentement a vos desirs ; mais usons un peu de temperament, je vous supplie, qui m'oste le blasme d'estre un peu trop facile en un sujet ou il y a danger d'outrecuydance.

Les freres aisnés succedoyent aux peres, anciennement, dans les familles, et estoyent comme vice peres de leurs freres, en sorte que c'estoyent des freres peres, et des peres freres ; et les puisnés estoyent des enfans freres et des freres enfans. Or sus , soyons comme cela. Il est vray, l'affection que j'auray pour vous tiendra rang, puisqu'il vous plait, de paternelle, a cause de sa force et constance, et de fraternelle, pour sa confiance et privauté ; et, comme que ce soit, " la charité esgale ceux qui l'ont ( Pythagore ) " avec tant d'art, qu'ilz sont entre eux freres, peres, meres, enfans. Or, c'est celle la dont vous me parles, mon tres cher Frere; c'est pourquoy je vous diray encor, mon tres cher Filz, et mon tres cher Pere encor.

Et moy, ne pouvant sans prejudice du porteur escrire plus longuement, je demeureray d'un cœur paternellement fraternel,

Vostre tres affectionné pere et frere,

FRANÇs, E. de Geneve.