[113]

¹ Quodam tempore, cum iret beatus Franciscus per quadam provinciam predicando, accidit ut obviaret cuidam pauperculo homini; et, dum consideraret magnam eius paupertatem, dixit socio suo: ² "Magnam verecundiam intulit nobis paupertas istius et multum reprehendit paupertatem nostram". ³ Respondit socius eius et dixit ei: "Quomodo, frater?". ⁴ At ille: "Magna verecundia est michi, cum invenio aliquem qui sit pauperior me, cum sanctam paupertatem elegerim pro mea domina et pro meis deliciis et divitiis spiritualibus et corporalibus; ⁵ et vox ista insonuerit toti mundo, scilicet quod professus sum paupertatem coram Deo et hominibus. ⁶ Quapropter debeo inde verecundari, cum invenio aliquem hominem qui sit pauperior me".