3. De frequenti invocatione nominis Iesu et Mariae

[...] me et salvus ero. Stude Deum invocare in omni opere mane meridie et vespere, cum sancto Daniele: et iuvaberis in omni necessitate corporis et animae. Iesum habe in corde: et eris mundus ab omni sorde. Sit Ave Maria saepe in ore; et repleberis Spiritus sancti consolatione. Solitudo et silentium oratio et ieiunium: arma sunt monachorum. Laborare in die, vigilare et orare in nocte: sanctorum exercitium speciale. Hoc Deo et angelis est acceptum: daemonibus contrarium; iuvenibus utile, senibus delectabile: pigris grave, devotis leve et suave. Cum non potes bene vigilare studeas Iesum invocare: et fugiet a te diabolus bonorum inimicus. Si non potes dormire prae tristitia; studeas Mariam salutare cum laetitia: et aderit tibi angelus sanctus bonorum amicus. Si taedet orare studeas psalmos ruminare; et confortabit te Spiritus sanctus consolator optimus: doctor intimus, illustrator cordis maximus.