5. De optimis bonis animae

Diligam te Domine virtus mea. Inter nobiles nil virtute nobilius: inter ignobiles nil vitio deterius. Inter pulchros et honestos nil castitate pulchrius ; inter scientias nil sapientia altius: inter devotos libros nil vita Iesu Christi salubrius. Inter omnes preces et laudes Dei nil Pater noster sanctius: nil Ave Maria dulcius et angelis iucundius. Omnia vota et desideria sanctorum oratio Dominica excellit: omnia dicta prophetarum et melliflua verba. psalmorum et canticorum plenissime et secretissime in se continet, omnia necessaria petit: Deum summe laudat, Deo animam coniungit; et de terra ad caelum levat: nubes penetrat, et angelos transcendit. Beatus qui attente singula verba Christi pensat.