8. De remediis contra vanam gloriam et laudem

NU Anitas omnis homo vivens. Noli extolli de aliquo bono coram hominibus; quia habes multos defectus intus quos novit Deus: et tu non vides nec ponderas sicut deberes. Qui laudem humanam quaerit de singulari facto: saepe confusionem incurrit Deo permittente coram multis in aperto. Vana gloria et amor propriae laudis decipiunt multos privando eos bonis aeternis: ut patet in virginibus stultis. Quid stultius quam vana diligere; et vera respuere? Quid perversius; quam Deum neglegere et hominem attendere? Quid amentius; quam mundum aspicere et caelum despicere? Cor divitis in terra: cor pauperis in caelo. Cor humilis sub Deo: cor superbi contra Deum.