Lettre CLII. À Monseigneur Claude de Granier, Évêque de Genève

(INÉDITE)

Compte-rendu de sa négociation à la cour de France. - Envoi d'une lettre du Nonce de Paris.

Paris, 8 février 1602.

Monseigneur,

Apres que la court a esté de retour en ceste ville, Monseigneur le Nonce a pris la peyne d'aller chez monsieur de Villeroy , auquel Sa M.ajesté nous avoit addressé pour traitter, et la j'ay bien eu a desbattre pour nos pretentions. Neanmoins, a la fin, j'ay donné ma requeste fondamentale, sur laquelle il me dit que le Conseil nous ferait droit et justice, et que nous n'en doutassions point. Ce qu'estant, je ne m'en puis retourner que bien depesché, Dieu aydant ; aussy vay je esventant certaines conjectures qui m'en font concevoir tres bonne esperance. Il y va un petit de la peyne et du tracas et un peu plus de tems que je ne pensois ; je l'abbregeray neanmoins le plus que je pourray, pour avoir l'honneur d'estre bien tost aupres de vous. Je suis marry que la despence soit si grande que des-ja nous soyons en faute d'argent ; toutefois, ce n'est ni faute d'espargne ni faute de soin, mays parce que tout nous a esté fort cher. Pourveu qu'il vaille, je pense qu'encor qu'il coste, tout sera trouvé doux.

Nous avons un Nonce plein de tres bonne volonté et qui s'employe de courage. Je vous envoye la lettre qu'il vous escrit sur le sujet de ma negociation, et, pour sçavoir plus a plein ce qu'il en esperoit, je me suis dispensé de l'ouvrir, avec la confiance accoustumee en vostre bonté et en l'asseurance que vous aves de la loyauté de mon intention a vostre service.

Nous n'avons aucunes nouvelles qui vaillent l'escrire, qui me fera finir par la tres humble reverence que je vous fay, vous baysant les sacrees mains, et priant Dieu qu'il vous donne, Monseigneur, ce que vous doit desirer et souhaitter

Vostre tres humble et tres obeissant filz et serviteur,

FRANçs DE SALES.

A Paris, le 8 febvrier 1602. Monsieur Deage vous bayse tres humblement les mains, comme fait aussy le bon Pere Galesius , qui part pour aller prescher a Calais.

A Monseigneur

Monseigneur le Reverendissime Evesque

et Prince de Geneve.

Revu sur le texte inséré dans le 1er Procès de Canonisation.