Lettre CLXII. Au Duc de Savoie, Charles-Emmanuel Ier

Retour de Paris. - Protestations de soumission et de dévouement. Demande de la protection de Son Altesse.

Thorens, 14 octobre 1602.

Monseigneur,

Je donnay advis a Vostre Altesse du voyage que je devois faire en France et du sujet qui m'y portoit, pour lequel ayant presque inutilement employé plusieurs moys, me trouvant maintenant de retour, j'estime aussi luy en devoir donner advis, affin qu'elle sache ou ses commandemens me rencontreront quand il luy plaira m'en honnorer. Ce que je me sens tous-jours plus obligé de faire, devant entrer en la charge d'Evesque par le trespas du bon et saint Prœlat duquel Vostre Altesse avoit tant gousté la pieté ; en la succession duquel (puisque ça esté le bon plaisir du Saint Siege et de Vostre Altesse de m'y appeller) j'espere vivre heureusement parmi une infinité de travaux et de peynes qui s'y presentent, sous la faveur et protection de Vostre Altesse, pour la prosperité delaquelle je feray toute ma vie prieres a Nostre Seigneur, et demeureray,

Monseigneur,

Son tres humble et tres obeissant sujet,

serviteur et orateur,

FRANçs DE SALES,

esleu Evesque de Geneve.

De Thorens, le 14 octobre 1602. A Son Altesse.

Revu sur l'Autographe conservé à la Visitation de Turin.