Lettre CXXXIX. À M. Antoine d'Avully
Le Saint rend compte de son intervention auprès du duc de Nemours pour le règlement d'une affaire d'intérêt.
Annecy, 9 avril 1601 ,
Monsieur,
Vostre homme arriva hier tout a propos pour treuver Monseigneur de Nemours encor en ceste ville. Je viens tout maintenant d'aupres de luy, et luy ay representé ce que vous aves desiré, a quoy il s'est rendu fort aysé ; et ne pouvant employer beaucoup de tems a la consideration de l'affaire pour tant d'affaires que la soudaineté de son despart luy a apportés, il a commandé sur le champ et en ma presence a monsieur le praesident Floccard de le despecher au plus tost que faire se pourra. A quoy ledit sieur Praesident a respondu qu'il le ferait infalliblement ; et despuys je l'ay repris, et le Procureur patrimonial encores, lesquelz conformement m'ont dit que sil vous playsoit d'en venir par termes de justice, la chose ne pouvoit pas se terminer du tout si tost, et qu'en ce cas il sera requis de voir ledit Procureur patrimonial repliquer a vos responces. Mays sil vous plait d'en venir a l'amiable et prendre un des premiers jours apres Pasques, vous series bien tost expedié. Ceste seconde voye me semble plus sortable. Ce pendant, sur cecy je vous prieray de me donner advis du choix que vous feres, et je le feray sçavoir audit sieur Procureur du domeyne. Monsieur le Prœsident m'a dit que si franchement et resolument vous vous contentés de rendre a Monsieur ce quil vous a baillé en eschange et reprendre le Turchet , la chose sera du tout hors de difficulté et de dilation.
Monsieur, excusés moy si je vous escris ainsy a baston rompu, car j'ay la teste tant rompue et d'ennuy et d'affaires que je ne pense guere aux paroles. Je vous salue de tout mon cœur, et madame d'Avully, et vous prie de [croire] que je seray tous-jours fort affectionnement,
Monsieur,
Vostre humble et tres affectionné serviteur,
FRANçs DE SALES.
A Neci, le 9 avril [1601]. Je n'ay pas parlé des 150 escus baillés au conte de Tournon par ce que je n'entendois pas bien l'affaire.
A Monsieur
Monsieur d'Avulli.
Revu sur l'Autographe conservé à Dôle, Ecole libre de Notre-Dame du Mont-Roland.
Chapter 18 of 110