Lettre CLXIV. À M. Claude de Blonay
Achat de la terre de Thorens par la famille de Sales. - Nécessité de contracter un emprunt pour payer ce domaine. - Prière d'intervenir à cet effet auprès de M. de Prangins.
Sales, 21 octobre 1602.
Monsieur,
Je ne vous escris point maintenant pour vous donner comte de ce que j'ay fait et que je n'ay pas fait en mon voyage ; ce sera une piece de nostre entretien a nostre premiere veüe. Mais je vous escris pour vous supplier de vouloir favoriser toute ceste maison, et moy particulierement, en un'occasion que nous pensons estre a nostre propos.
Je pense que vous aures sceu que ma mere et mes freres, avec le reste de casa, ont achepté la terre de Thorens de madame la Duchesse de Mercœur, pour le prix de 6000 escus d'or , et pense aussi que vous sçavés que ce n'a peu estre sur la confiance d'aucun tresor que nous eüssions en main. Neanmoins, ma mere et ses confederés ont tant fait que le premier payement de six mille francz est presto Reste quatre mille escus, lesquelz nous ne pouvions assembler que par l'exaction de l'argent qui nous est deu et par des ventes d'autres biens, et des engagemens ; mais tout cela ne se peut bien faire qu'avec du loisir, comme vous pouves penser. C'est ce qui nous a fait penser a un autre remede, qui est d'emprunter sil se peut, quelque bonne somme de deniers, pour, par apres, vendre et mesnager a l'aise nos desseins ; et nous sommes advisés de monsieur de Prangin , lequel on estime en semblables occasions asses bon medecin, pour autant quil a les drogues necessaires, pourveu que son argent soit bien asseuré. Or, en cas quil le voulut, nous nous essayerions de le luy bien asseurer, et, au moins pour mille escus, estimons-nous que monsieur Muneri nous fera le bien de nous cautionner, d'autant que c'est la somme laquelle, ou environ, l'hoire du Baron d'Hermence ( cf lettre 125), de laquelle il est curateur, nous doit encores . Et pour le reste, si on en pouvoit treuver d'avantage, nous nous essayerions de treuver caution bonne et raysonnable, et payerions les interestz comme il seroit traitté, fort bien et sans peyne.
Reste maintenant que quelcun nous face ce bien que de prendre la peyne de sonder si monsieur de Prangin y voudroit entendre, ou bien, a faute de luy, sil se pourroit trouver quelqu'un autre, ou en Valey ou ailleurs de ce costé la qui le voulut faire. Et pour ce regard, la vielle amitié quil vous a pleu de nous porter, et a toute ceste mayson, nous a donné confiance de vous supplier de nous faire ce bon office en quelque façon que ce soit, ou par l'entremise d'amis ou par vous-mesme, comme vous jugerés plus a propos. Nous vous en supplions donques humblement, et de nous en donner les advis le plus tost que vostre commodité le permettra.
Et en cas que monsieur de Prangin vous semble le plus duisant, vous pourriés, sil vous plait, me mettre en consideration, et ma promotion a l'evesché, bien que la verité est que cela ni apporte rien ; mais je le dis seulement par ce quil m'ayme et me connoist, et que telle cause est probable. Je remetz en fin toute ceste conduitte a vostre prudence et a la bonne et entiere amitié que vous nous portes, sans vous en dire plus de paroles, sinon que la somme que nous desirerions seroit de trois mille, deux mille ou au moins mille escus.
J'attens de jour a autre les despeches de Romme necessaires pour la resolution et execution de l'affaire de l'evesché ; les ayant, je vous en feray sçavoir des nouvelles et ne parleray plus que des choses spirituelles, attendant cependant de vous des nouvelles de ces choses temporelles, que je vous supplie d'embrasser pour ceste mayson, qui vous est entierement acquise et servente, et de moyen particulier, qui ay tous-jours esté et seray toute ma vie,
Monsieur,
Vostre humble et asseuré confrere et serviteur,
FRANçs DE SALES,
esleu E. de Geneve.
A Sales, le 21 octobre 1602. A Monsieur
Monsieur de Blonnay.
A Siez.
Revu sur l'Autographe conservé au château de Marin (Chablais), Archives de Blonay.
Chapter 43 of 110