Lettre CLI. À M. Claude de Quoex

Départ du Saint pour Dijon et Paris afin de solliciter le rétablissement de la religion dans le pays de Gex. - Nécessité d'obtenir la médiation du Saint-Siège auprès du roi de France. - Influence du Cardinal d'Ossat sur le monarque. - Nouvelles de Mme de Quoex. - Divers messages. - Bon vouloir du baron de Lux; oppositions de Lesdiguières.

Meximieux, .3 janvier 1602.

Monsieur,

En peu de motz prou de choses, car je suis pressé. Me voyci a Messemieu avec monsieur nostre Praesident , et chez luy, devans partir tous deux aujourdhuy pour aller a Dijon, luy, a la solicitation d'un proces qui luy est important, moy, pour y trouver monsieur le mareschal de Biron et monsieur le baron de Lux desquelz je praetens obtenir une puissante recommandation aupres du Roy, ou, des Dijon, je m'achemineray pour nos affaires de Gex desquelz voyci l'estat.

Monsieur le baron de Lux, au nom du Roy, conduisit Monseigneur le Rme au balliage de Gex sur le commencement du moys passé, et luy donna trois parroisses pour y exercer la religion catholique : la ville de Gex, Farges et Asserens, et en consequence, bailla mainlevee a mondit Seigneur Rme des revenuz ecc1esiastiques desdites parroisses. Nous ne sommes pas contens de si peu, car nous demandons tout, tant pour l'exercice, qui va premier, que pour les biens ; non seulement par ce que cela nous accommodera, mais encor plus par ce que cela incommodera la religion huguenotte, laquelle devant estre entretenue aux despens du peuple, manquera bien tost et indubitablement. Nostre requeste portoit cela. Sur quoy monsieur de Lux nous renvoye au Roy et a son Conseil ou je vay pour cest effect, appuyé de tant de rayson que, pour peu qu'elle soit aydee, nous serons victorieux.

Or, Dieu merci et vous, le Pape nous veut ayder ; cela y est extremement requis. Il faut instare opportune, importune .(2 Tm 4,2) Monseigneur le Nonce de France escrit a Monsieur le Rme quil a charge de nous ayder, quil a commencé a le faire, quil trouve le Roy disposé, quil ne faut que bien solliciter et instruire. J'y vay pour cela; mays, pour ne rien oublier, je voy que le coup de cest affaire gist en un'estroitte recommandation du Saint Siege, laquelle seroit extremement efficace si Sa Sainteté en parloit a Monseigneur le Cardinal d'Aussat, luy commandant d'en escrire favorablement au Roy ; car on m'a dit qu'il ny a point d'entremise a Romme a laquelle le Roy defere tant comme a celle la . J'espere d'estre a Paris dans 10 ou 12 jours, la ou sil vous plait m'escrire dans les pacquetz de Madame , les lettres ne se perdront point.

A mon despart du pais j'ay laissé tout en santé, les vostres et les nostres, specialement madame vostre partie , laquelle estoit a Polinge quand Monseigneur le Rme estoit a Gaillart a la benediction des eglises, ou je fus ; et, sur mon chemin, visitay les freres et seurs audit Pollinge et Mairens.

Touchant la coadjutorie, je vous bayse les mains de la peyne que vous en aves. Nous verrons que ce fut ; de quel costé qu'aille la barque, le port m'en sera aggreable. Je bayse mille fois les mains a nostre R. P. Juvenal, auquel j'escriray des Paris de statu rerum omnium . Item,

je salue nostre monsieur Reydet in toto corde, messieurs Gojon , la patrie . Me voyla au reste pour jamais,

Monsieur,

Vostre humble serviteur,

FRANÇ" DE SALES.

A Messemieu, le 3. jour de janvier 1602. Nous avons laissé a Gex messieurs les chanoynes de Sales, Grandis, Bochuti. Nous sommes incroyablement redevables a la pieté et religion de monsieur de Lux, quil a fait paroistre en toute sa negociation. Monsieur Desdiguieres se treuv'a Gex le jour que nous y fusmes ; les ministres recoururent a luy, ausquelz il dit quil ni avoit remede, que le Roy le vouloit, mais quilz gardassent tant quilz pourroyent les biens d'Eglise, car cela maintiendroit leur religion non obstant nostr'exercice.

A Monsieur

Monsieur de Quoex, Docteur es Droitz.

A Romme.

Seporvis (?)

Revu sur l'Autographe conservé à Chambéry, Archives du Sénat.