Lettre MDLXXV. À M. François de Montholon

(FRAGMENT)

Douces plaintes et légitimes excuses. - Quelle coopération l'Evêque de Genève a donnée au mariage de M. de Foras.

Annecy, 13 décembre 1619.

…………………………………………………………………

Permettes moy, je vous supplie, Monsieur, de soulager mon ame en me plaignant a vous mesme de vos plaintes, lesquelles a la verité m'affligent et m'estonnent, ne croyant pas d'en avoir donné aucune occasion ; puisque, hors le .veritable tesmoignage que j'ay rendu une seule fois des merites et bonnes qualités du gentilhomme, et une autre fois de sa religion , je n'ay nullement cooperé a cette alliance que peut estre par la recommandation que j'en ay faite a Dieu, si elle devoit estre a sa gloire ; et tout ce qui se dit de plus n'est qu'exageration.

Il est vray que les parties s'estans liees d'affection et de promesses pendant mon absence , je fus present, soudain apres mon retour, a la repetition des promesses qu'elles voulurent renouveller devant moy ; mais d'une presence si simple que je ne fis qu'escouter avec plusieurs autres sans dire mot. Pouvois je refuser de telz offices a de telles personnes ? Non plus que celuy que je fis envers vous, Monsieur, qui, ce me semble, ne me fistes pas sçavoir que vous eussies une si puissante aversion pour ce mariage, que de la j'eusse peu inferer cet ardent mescontentement que vous aves, ce me dit on………..