Lettre MDLXII. À Monseigneur Jean-Pierre Camus, Évêque de Belley ( L4, Note 197 )

Deux amis qui n'ont pu se dire adieu, ni se rencontrer en chemin. – Le " nid" de l'Evêque de Genève bien loin de 1' " aymable Paris" de l'Evêque de Belley. - Pourquoi les PP. Capucins sont plus propres à faire le bien dans le diocèse de Mgr Camus. - Messages d'honneur et d'affection.

Chambéry, 27 octobre 1619.

Monseigneur,

L'affection que vous aves pour moy vous fera, comme je croy, asses imaginer quel a esté mon desplaysir de partir de Paris sans avoir eu lhonneur de prendre congé de vous, que peut estre ne reverray-je jamais . A Chatres (sic) on me dit que vous esties a Estampes ; a Estampes on me dit que vous esties a Chatres, et je croy que vous n'esties ni en l'un ni en l'autre des lieux, mays ou a Maubuisson ou par les chemins. En somme, me voyci en mon nid ; quelle qu'en soit la vallee, il me sera tous-jours avis que vous en soyes a une journee prés, et en vain, car vous seres dans vostre aymable Paris, parmi cette multitude d'ames que Dieu veut tenir par vostre entremise .

Or, passant icy et entre les a Dieu que je dis a nostre court , les RR. PP. Capucins m'ont fait entendre comme ilz sont desirés a Belley, ou d'autres Religieux se desirent en leur place ; et je sçai, Monseigneur, que vostre intention premiere fut d'avoir des Religieux qui administrassent le saint Sacrement de l'absolution, mays que si les Capucins le pouvoyent administrer, vous les praefereries a tous autres. Et a la verité, ilz sont praeferables pour mille raysons, puisque maintenant ilz ont faculté de confesser en cette Province ; car ilz ont des gens de capacité, une renommee et approbation incomparable des peuples, une pauvreté qui incommode le moins ceux qui les entretiennent, une correspondance entr'eux qui peut tenir en observance les Religieux, et une tres particuliere inclination a vous honnorer. C'est pourquoy, vostre Belley attendant sur ce vos commandemens, je vous supplie de contribuer vostre authorité a ce parti, duquel je sçai que vostre bercail sera grandement consolé, et vous extremement satisfait .

Ce pendant, Monseigneur, faites moy la grace de ne point permettre que mon esloignement de vostre presence diminue vostre sacree bienveuillance envers moy qui vous honnoreray a jamays tres cordialement, et seray invariablement

Vostre tres humble et tres obeissant frere et serviteur,

FRANçs, E. de Geneve.

A Chamberi, le 27 octobre 1619.

Si je n'esperois d'escrire a la Visitation de Paris et a Maubuisson bien tost, je vous supplierais de commander a M. Jantet qu'il fit mes honneurs en ces deux Maysons ; mays puisque dans deux ou trois jours je les feray moymesme par lettres, je me contenteray, si! vous plait, quil asseure monsieur et madame de Saint Bonet de mon humble obeissance ; et quand j'escriray par dela, je n'oublieray pas de rendre mon devoir a madame de Herce .

A Monseigneur

Monseigneur le Rme Evesque de Belley,

Prince du St Empire.

Revu sur l'Autographe conservé à Milan, Archives du prince Trivulzio.