Lettre MDLXXIX. À Madame Angélique Arnauld, Abbesse de Port-Royal a Maubuisson

Un Père qui connaît bien sa fille. - Les cerisiers et les palmiers. - Regard compatissant sur les faiblesses humaines. - Combien de fois le jour remettre son cœur " en posture d'humilité ". - La volonté du saint Evêque " suivante " de celle de Dieu. - Deux âmes en péril. - Encouragement à une affligée. - Difficultés suscitées au bien. - Une des joies du Ciel.

Annecy, 16 décembre 1619.

Je commence par ou vous finisses, ma tres chere et tres veritablement bienaymee Fille ; car vostre derniere lettre, entre celles que j'ay receuës, finit ainsy : " Je croy que vous me connoisses bien. " Or il est vray, certes, je vous connois bien, et que vous aves tous-jours dedans le cœur une invariable resolution de vivre toute a Dieu; mais aussi, que cette grande activité naturelle vous fait sentir une grande vicissitude de saillies. O ma Fille, non, je vous prie, ne croyes pas que l'œuvre que nous avons entrepris de faire en vous puisse estre si tost faite. Les cerisiers portent bien tost leurs fruitz parce que leurs fruitz ne sont que de cerises de peu de duree ; mays les palmiers, princes des arbres, ne portent leurs dattes que cent ans apres qu'on les a plantés, ce dit on. Une mediocre vie se peut acquerir en un an; mays la perfection a laquelle nous pretendons, 0 Dieu ! ma chere Fille, elle ne peut venir qu'en plusieurs annees, parlant de la voye ordinaire.

Dites bien encor ceci a cette fille que je vous ay tant recomniandee , qu'en verité je ne la puis oublier ni jour ni nuit, mon ame reclamant incessamment la grace de Dieu sur elle ; et dites luy hardiment que non, je ne m'estonneray jamais de ses foiblesses et imperfections. Ne serois je pas un desloyal arrogant si je ne la regardois en douceur parmi les effortz qu'elle fait de s'affermir en la douceur, en l'humilité, en la simplicité ? Qu'elle continue donq fidelement ses poursuites, et je continueray sans cesse de souspirer et respirer pour son bien et avancement. Le bon pere me remercie si bonnement de la dilection que je porte a cette chere fille, sans considerer que c'est une affection qui m'est si pretieuse et tellement naturalisee en mon ame, que personne ne m'en doit sçavoir non plus de gré que dequoy je me souhaitte du bien a moy mesme.

Mais dites luy, a cette chere fille, qu'en l'exercice du matin elle mette son cœur en posture d'humilité, de douceur et de tranquillité, et qu'elle s'y remette apres disner, pendant Graces, et a Vespres, et le soir ; et que parmi la journee elle se souvienne que je le luy ay dit.

Dites luy que je demeure icy, en mon diocese, tandis qu'il plaist a Dieu; et que, comme rien ne m'en peut tirer que quelque particuliere occasion que je croiray estre a la gloire de Nostre Seigneur, aussi, cela se presentant, je n'auray non plus difficulté de me desprendre maintenant des faveurs que je reçoy, qu'auparavant qu'elles me fussent donnees. Je suis et seray et veux estre a jamais a la mercy de la providence de Dieu, sans que je veuille que ma volonté y tienne autre rang que de suivante. Vous sçaures tous-jours tout, mais mesnages-le. On m'invite d'aller de rechef a Paris, en une aggreable condition ( note 92 ), J'ay dit : Je n'iray point la, ni ne demeureray icy, sinon en suite du bon playsir celeste. Ce païs est ma patrie, selon ma naissance naturelle ; selon ma renaissance spirituelle, c'est l'Eglise. Par tout ou je penseray mieux servir celle ci, j'y seray volontier, sans m'attacher a celle la.

Non, ma Fille, ne laisses pas l'oraison que pour des occasions qu'il est presque impossible de recouvrer. Il n'y a point de mal, ains du bien, a traitter avec nostre bon Ange.

Mais disons un mot de nos cheres Filles. Helas ! la pauvre N. perdra elle ainsy le fruit de sa vocation ? O mon Dieu, ne le permettes pas. Sa pauvre seur est en grand danger, a ce qu'on m'escrit; et je vous asseure que mon ame en est toute affligee, et voudrois, si je pouvois, beaucoup faire pour retenir ces deux seurs pour Dieu qui les veut, pourveu qu'elles ne resistent .

Je n'escris point pour le present a nostre chere seur Catherine de Gennes Je croy que l'assemblee de L. n'aura rien peu contre elle, puisque vous ne m'en dites rien. O non, car Dieu protegera cette chere ame et ne permettra pas qu'une si rude tempeste la vienne accabler. Qu'elle reprenne ses espritz et qu'elle vive joyeuse.

Quant a la C. , il ne faut pas treuver estrange le refus qu'on en a fait : le bien qui en doit reuscir est trop grand pour n'avoir point de difficulté et de contradiction. M. reviendra a soy; certes, je ne me suis sceu empescher de luy en escrire bien amplement, encor que je ne le connoisse point m'estant advis que je le devois pour le bien des affaires de Nostre Seigneur.

Demeures en paix, ma tres chere Fille, et pries souvent pour mon amendement, affin que je sois sauvé et qu'un jour nous tressaillions en la joye eternelle, nous resouvenant des attraitz dont Dieu nous a favorisés, et des reciproques consolations qu'il a voulu que nous eussions en parlant de luy en ce monde. O ma Fille, il soit a jamais l'unique pretention de nos cœurs. Amen.

Le 16 decembre 1619.