Lettre MDCXXIV. À la Princesse de Piémont, Christine de France

(MINUTE)

Les faveurs considérées en ceux qui les donnent et en ceux qui les reçoivent. - Ce que la princesse a dû voir dans le cœur de François de Sales et dans celui de son frère.

Annecy, 6 mars 1620 .

Madame,

Si vous mesures vos faveurs a ce que Dieu a voulu que vous fussies, il n'yen aura jamais de trop grandes; mays si elles sont balancees avec le merite de ceux qui les reçoivent, celle dont il vous a pleu de gratifier mon frere et moy, en la nomination faite par Son Altesse, sera sans doute des plus excessives, et faudra advoüer, Madame, qu'elle n'a nul fondement qu'en la grandeur de vostre bonté ; sinon que, parmi plusieurs graces de Dieu, vous aves encor celle la de connoistre les cœurs, et que dedans les nostres Vostre Altesse ayt regardé l'incomparable passion que Dieu mesme y a mise, pour nous rendre infiniment dediés a vostre service et nous faire resigner a jamais a l'obeissance de vos commandemens : car en ce cas, Madame, s'il vous a semblé bon de mettre en consideration nostre tres humble sousmission, Vostre Altesse aura bien eu quelque sujet de nous departir ce bienfait, duquel je luy rens tres humbles graces.

Et luy en faysant reverence avec un extreme respect, je prie la divine Majesté qu'elle comble la royale personne de Vostre Altesse de l'abondance de ses benedictions, qui suis,

Madame.

Vostre tres humble, tres obeissant et tres fidele orateur et serviteur,

FRANçs, E. de Geneve.

Le… mars 1620.