Lettre MDCXXXVII. À la Duchesse de Nemours, Anne de Lorraine

Trois requêtes renouvelées ; appel à la bonté, à la justice, à la piété du duc et de la duchesse de Nemours.

Annecy, 11 avril 1620.

Madame,

Je pense que Vostre Grandeur aura bonne souvenance que, donnant advis a Monsieur de la mort du feu sieur [de] Charmoysi , je le suppliay tres humblement de continuer sa grace et ses bienfaitz a la vefve et au filz du defunt ; ce que Sa Grandeur m'accorda avec une tres grande demonstration de sa volonté et inclination a cela, et Vostre Grandeur, Madame, adjousta sa toute puissante faveur a ma recommandation.

Maintenant donq, renouvellant ma supplication, je recours de rechef a cette mesme gratification qu'il pleut a Vostre Grandeur de tesmoigner, affin qu'il luy playse d'en commander les depesches, comme aussi ceux de deux autres graces que je demanday a Monsieur pour deux autres de mes amis ; puisque, si je ne me trompe, l'une est de justice, pour reparation d'un tort fait a un gentilhomme nourri et envielli au service de Monsieur , et l'autre est de pieté, pour l'assoupissement d'un proces que les gens de Sa Grandeur ont avec deux filles pupilles . Et je me garderay fort bien de jamais rien demander, ni mesme desirer de vostre bonté, Madame, ni de celle de Monsieur, qui ne soit selon les loix de l'honneur et bonheur que j'ay d'estre,

De Vostre Grandeur, Madame,

Le tres humble………………………………..

Annessi, 11 avril 1620.