Lettre MDCXXVI. Au Président François de Tardy

Bon droit des Religieux de Sixt et grande misère des habitants du pays.

Annecy, 18 mars 1620.

Monsieur,

Outre que les venerables Religieux de Six, pour leur bonne vie et affection a la reformation, meritent d'estre protegés, l'affaire qu'ilz ont maintenant prenant son origine en partie de la visite que j'y ay faite , et en laquelle je puis bien prendre Dieu mesme a tesmoin d'avoir eu seulement son service en veüe, et en laquelle, de plus, je n'ay presque rien ordonné qu'apres avoir, par raysons, tiré le consentement amiable des parties, je me sens obligé de faire avec lesdits Religieux une mesme supplication aupres de vous, affin qu'il vous playse de les favoriser en la conservation de leur bon droit; en quoy vous feres chose grandement aggreable a Nostre Seigneur et qui m'obligera extremement, qui suis a jamais, Monsieur,

Vostre serviteur tres humble,

FRANçs, E. de Geneve.

XVIII mars 1620, Annessi.

Monsieur, les habitans de Six, pour leur grande misere, sont dignes de compassion, et, pour leur pieté, sont dignes d'estre affectionnés ; c'est pourquoy je ne fay point de difficulté de vous supplier tres humblement de leur departir vostre justice et faveur en la conservation de leurs bons droitz .

A Monsieur

Monsieur de Tardy, Conseiller d'Estat de S. A.,

President au souverain Senat de Savoye.

Revu sur l'Autographe conservé à la Visitation d'Annecy.