Lettre MDCXLV. À la Mère de Chantal, a Paris

Quatre objections au projet de fixer l'Evêque de Genève en France. - Son désir de demeurer attaché à son Eglise. - Ce qui vaut mieux pour lui qu'un chapeau de cardinal. - Point de népotisme. - Voyage probable à Rome.

Annecy, 14 mai 1620.

Or sus, ma Mere, je suis dans vostre parloir , ou il m'a fallu venir pour escrire ces quatre ou cinq lettres que je vous envoye .

Il faut donq que je vous die que je ne puis avoir opinion que rien se face de ce costé-la, que vous sçaves, si Dieu ne le veut de sa volonté absolue ; car premierement, ce fut ce que d'abord je dis a Monsieur le Cardinal , que si je quittois ma femme, ce seroit pour n'en avoir plus. Je vay doucement, quoy qu'avec grand travail, supportant les charges de la mienne, avec laquelle je suis envielly : mais, avec une toute nouvelle a moy, que ferois-je ? La seule gloire de Dieu, manifestee par mon superieur le Pape, me peut oster de cette demarche .

2. Voyla mon frere Evesque; cela ne m'enrichit pas, il est vray, mais cela m'allege et me donne quelque esperance de me pouvoir retirer de la presse : cela vaut mieux qu'un chapeau de Cardinal.

3. Mais vos neveux seront pauvres . Ma Mere, je considere qu'ilz ne le sont pas des-ja tant comme ilz estoyent quand ilz nasquirent, car ilz nasquirent nuds. Et puis, deux ou trois mille escus, ni quatre mesme, ne me donneroyent pas dequoy les secourir, sans diminution de la reputation d'une prelature en laquelle il faut tant d'aumosnes, d'œuvres pies, et de frais justes et requis.

4. Voyla Son Altesse qui me mande advertir que de toute necessité il veut que j'accompaigne Monseigneur le Cardinal son filz a Rome ; et en effect, il sera a propos, pour le service mesme de l'Eglise, que je face ce voyage, bien qu'en toute verité, ma Mere, il ne soit nullement selon mon inclination : car en somme, c'est tous-jours aller, et j'ayme a demeurer ; et c'est tous-jours aller a la cour, et j'ayme la simplicité. Mais il n'y a remede ; puisqu'il le faut, je le feray de bon cœur, et tandis, les pensees de ce grand Prelat de dela auront du loysir de se dissiper. En somme, je ne feray rien pour ce parti la que je ne sois grandement asseuré que Dieu le veuille. N'en parlons donq plus que selon les occurrences, ma Mere.

Je suis a jamais, sans reserve et sans comparayson, c'est a dixe au dessus de toute comparayson, vostre, et certes, comme vous sçaves tres bien vous mesme, je suis vostre tres parfaitement.

Le 14 may 1620.

FRANçs, E. de Geneve.