Lettre MDCLVII. À M. Guillaume de Bernard de Foras

Permutation probable de François de Sales et de son frère. - Un esprit qui aurait besoin de mûrir. - Annonce d'une lettre à la Mère de Chantal.

Annecy, 2 juin 1620.

Monsieur mon tres cher Frere,

Je ravis ce moment pour vous saluer tres humblement, et madame ma tres chere Seur, ma fille , et vous affirmer que tout ce qui vous appartient icy se porte bien, et, comme je pense, encor a Turin, ou, ainsy que je voy, nostre commun frere arrestera encor un moys ou six semaines, affin de rendre quelque bon service a Madame apres son sacre, et que, revenu icy, je puisse aller la en sa place .

Ce porteur est tous-jours luy mesme . Si l'air de Paris pouvoit un peu meurir son esprit, ce luy serait un grand bonheur. Il m'a grandement vanté l'honneur qu'il dit avoir de vostre bienveuillance ; ce seroit bien la plus advantageuse qualité qu'il peust posseder. Si Monsieur luy fait du bien (et mesme il [y] pretend), peut estre s'assujettira-il plus qu'il n'a fait jusqu'a present a mieux vivre.

Voyla tout, car, pressé que je suis, je differe d'escrire a la bonne Mere de Chantal jusqu'a vendredi ou samedi, que je pourray prendre plus de loysir. Que si vous aves aggreable de [le] luy faire sçavoir, elle en sera consolee.

Aymes moy tous-jours, s'il vous plait, et vous en supplie tres humblement, Monsieur mon Frere, et croyes qu'a jamais je seray

Vostre tres humble frere et serviteur,

et de Madame ma chere Seur, ma fille,

FRANçs, E. de Geneve.

Je vous supplie de treuver bon que je salue en ce petit bout de lettre monsieur et madamoyselle Rousselet .

Le 2 juin 1620, Annessi.

A Monsieur de Foras.

A Paris.