Lettre MDCLXXXIX. À la Mère Geneviève de Saint-Bernard, Prieure du Carmel de Chartres

Quand Dieu nous a donné une charge, il nous doit sa grâce pour la bien remplir. - Petit dialogue. - On est fidèle, si on est humble ; on est humble, si on désire l'être. -Le pain quotidien. - Faire bien aujourd'hui, sans penser à demain, se fiant en la Providence.

Annecy, [juillet-août 1620 ]

Ma tres chere Fille,

Quelle consolation pour vous que c'est Dieu mesme qui vous a faite Superieure, puisque vous l'estes par les voyes ordinaires. C'est pourquoy sa Providence est obligee, a sa disposition, de vous tenir de sa main affin que vous fassies bien ce a quoy il vous appelle. Croyes, ma tres chere Fille, il faut aller a la bonne foy sous la conduite de ce bon Dieu, et ne point disputer contre cette regle generale, que Dieu qui a commencé en nous le bien, le parfaira (Ph 1,6) selon sa sagesse, pourveu que nous luy soyons fideles et humbles.

Mays on va rechercher entre ses serviteurs quelqu'un qui soit fidele (1 Co 4,2). Et je vous dis que vous seres fidele si vous estes humble. Mays seray je humble ? Ouy, si vous voules. Mays je le veux. Vous l'estes donq. Mais je sens bien que je ne la suis pas. Tant mieux, car cela sert a l'estre plus asseurement.

Il ne faut pas tant subtiliser, il faut marcher rondement; et comme il vous a chargee de ses ames, charges le de la vostre, affin qu'il porte tout luy mesme, et vous et vostre charge sur vous. Son cœur est grand, et il veut que le vostre y ayt place. Reposes vous ainsy sur luy, et quand vous feres des fautes ou des defautz, ne vous estonnes point ; ains, apres vous estre humiliee devant Dieu, souvenes vous que la vertu de Dieu se manifeste plus glorieusement dans nostre infirmité

( 2 Co 12, 9 ). En un mot, ma chere Fille, il faut que vostre humilité soit courageuse et vaillante, en la confiance que vous deves avoir en la bonté de Celuy qui vous a mise en charge.

Et pour bien couper chemin a tant de repliques que la prudence humaine, sous le nom d'humilité, a accoustumé de faire en telles occasions, souvenes vous que Nostre Seigneur ne veut pas que nous demandions nostre pain annuel, ni mensuel, ni hebdomadal, mais quotidien ( Lc 11,3 ). Tasches de faire bien aujourd'huy, sans penser au jour suivant ; puis, le jour suivant, tasches de faire de mesme ; et ne penses pas a ce que vous feres pendant tout le tems de vostre charge, ains alles de jour en jour passant vostre office, sans estendre vostre souci, puisque vostre Pere celeste qui a soin aujourd'huy, aura soin demain et passé demain de vostre conduitte, a mesure que, connoissant vostre infirmité, vous n'espereres qu'en sa providence.

Il m'est advis, ma tres chere Fille, que je vay bien a la bonne foy avec vous de vous parler ainsy, comme si je ne sçavois pas que vous sçaves mieux que moy tout ceci ; mays il n'importe, car cela fait plus de coup quand un cœur ami le nous dit.

Je suis vostre.

FRANÇs, E. de Geneve.