Lettre MDCXCVI. À Madame de Villeneuve

Une action héroïque, digne des premiers temps du christianisme. - Servir Dieu en Dieu. - Consolation et force.

Annecy, 9 août 1620.

Je me res-jouys avec vous, ma tres chere Fille, de la retraitte de la chere seur , tant par ce qu'en verité ell'a esté faite genereusement, saintement et, pour le dire comme je l'entens, heroiquement et a la façon de ces anciennes ames du christianisme de l'aage plus saint, qu'aussi dautant que, comme m'a escrit la bonne Mere Superieure , vous aves autant de part en cette retraitte, et plus encor, que si vous vous fussies retiree vous mesme, en cas quil vous eut esté loysible. O c'est ainsy, ma Fille tres cherement bienaymee, quil faut servir Dieu, car c'est le servir en Dieu et par l'amour souverainement et incomparablement excellent.

Je sçai le fort, vif et tendre amour de vostre cœur envers cette seur, et que cette petite separation luy aura costé des grans effortz, et c'est cela qui me donne mille playsirs en la partie superieure ; car en l'inferieure, croyes moy, ma Fille, j'ay treuvé mon sentiment engagé dans le vostre, tant il est vray en un sens tres sincere, que " l'amour egale les amans ( Pythagore ). " Vous aves donq si bonne part en ce sacrifice aggreable, que je m'en res-jouis tres affectionnement avec vous, et croy que la divine Bonté aura une douce souvenance de vostre holocauste et confirmera vostre conseil,

et vous rendra, selon l'intention de vostre cœur ( Ps 19,4 ) une consolation qui vous fera tousjours croistre en cet amour, ou une force qui, sans consolation, vous fera tous-jours de plus en plus parfaitement servir ce celeste amour.

Je ne sçai que vous dire, ma tres chere Fille, sinon que je suis indiciblement et incroyablement vostre.

Vive Jesus ! Amen.

IX aoust 1620.

A Madame

Madame de Villeneufve.

Revu sur l'Autographe appartenant aux Filles de la Croix de Tréguier.