Lettre MDCXCIII. À la Mère de Bréchard Supérieure de la Visitation de Moulins

(INÉDITE)

Un passage d'une lettre de Mme du Tertre. - Réponse que lui fit François de Sales. - Sa décision après plus ample information. - La douceur des Règles de la Visitation Sainte-Marie. - " Oublier les orages et flotz, " et ne point se lasser de souffrir.

Annecy, 9 août 1620.

Ma tres chere Fille,

J'ay receu vostre grande lettre, a laquelle je ne me suis pas hasté de respondre par ce que des-ja j'avois respondu a tout ce qu'elle contient par la lettre que j'escrivis et a vous et a Mlle du Tertre ( lettres 1682, 1684 ), que je mis dans un paquet que j'addressay a monsieur le Mareschal par monsieur des Hayes qui, revenant de Constantinople, alloit en poste au Roy ; et je m'asseure que vous l'aures receue.

Voyci les propres paroles de la lettre que Mlle du Tartre (sic) m'avoit escritte : " Je ne fus pas asses satisfaite d'avoir consulté les Capucins; je desiray voir le bon P. Recteur , auquel je vous puis asseurer, Monsieur, que je dy tout l'engagement, et de la mesme sorte que je vous l'ay escrit. Il me dit que, dans l'interest de Dieu et le mien, je devais me tenir en cette ville, mais neantmoins ayder l'establissement de la Mayson de Nevers, et quil me feroit voir par ses livres que c'estoit avec des tres bonnes raysons quil me disait que je pouvois transmuer mon dessein. " Sur cela, je luy escrivis, et a vous, qu'elle devroit suivre l'advis de ce Pere, qui ne peut estre que grave personnage, et donner une partie de ses moyens pour Nevers, gardant l'autre pour Moulins, en sorte qu'en faisant l'un elle n'abandonnast pas l'autre.

Mays on ne m'avoit pas dit tout, et je viens de l'apprendre tout maintenant. Le vœu n'est pas demeuré entre Dieu et Mlle du Tertre; la promesse est passee jusques a Nevers et ell'y a esté acceptee, et en suite de l'acceptation, on a acchepté places, mayson et meubles jusques a dix mille francz, par commission donnee de la part de madamoyselle du Tertre . Certes, j'adjouste donq que, tout au fin moins, les dix mille francz employés par ordre de madamoyselle du Tertre, sur sa parole, en suite de son vœu, ne peuvent ni doivent estre retirés, sinon que, comm'il se peut faire, je sois grandement deceu en l'intelligence des docteurs. Mais je m'asseure que le P. Recteur se sera bien fait expliquer tout le fait et aura, par sa prudence, accommodé toutes choses selon le droit ; et je m'asseure que Mlle du Tertre aura eu de la consolation de voir que, par ses moyens, l'une des Maysons soit Fondee et l'autre mieux establie en commodités ; et cela ne luy devra nullement oster le tiltre de fondatrice, au contraire, elle le meritera doublement.

Et quant aux exceptions qu'elle desireroit pour moins incommodement vivre dans le monastere : pourveu qu'elle se sousmette aux Regles et aux Constitutions essentielles (en quoy, comme en toutes autres choses, le Pere Recteur et les autres theologiens vous pourront bien conseiller) ; il ny a Regle au monde, ni Constitutions qui s'accommode (sic) tant aux infirmes que celles de cet Institut. Et quant a l'obeissance, qui est essentielle, ell'est tousjours bien douce, ce me semble, quand on est en des monasteres ou les Superieures sont bien conditionnees, principalement aux filles infirmes et qui pour quelque digne sujet sont exceptees.

Le Monastere de Nevers ira bien, apres que toutes ces bourrasques auront esté appaysees. Il n'est pas besoin de se mettre en souci si celles ci ou celles-la y entreront ; Dieu, duquel la providence a fait ce buisson, sçait bien quelz oyseaux y doivent chanter ses louanges.

Si la fille dont vous m'escrives, du marchand qui a mené les affaires, a sa vocation aux Carmelites, qui oseroit avoir pensé de la desirer ailleurs ? Elle sera bienheureuse d'estre en une si sainte assemblee. Que si ell'est pour Sainte Marie, ell' y treuvera bien aussi de quoy y servir sa divine Majesté .

Vous aves grandement bien accompaignee ma Seur Paule Hieronime de luy avoir donné ma Seur de Chatelu . Si celle qui luy succede aupres de vous ne fait pas tant de besoigne, il faut avoir patience ; on ne peut pas avoir toutes choses a souhait. Seulement je vous prie de reprendre patience, oublier les orages et les flotz, et mesnager le reste de vostre navigation tranquillement. Vous n'eutes jamais tant de peine ni de mal de cœur que parmi ceste bourrasque ; benisses Dieu, demeures humble et courageuse, et ne vous lasses point de souffrir beaucoup.

Si je puis, j'escriray un mot a Mlle du Tertre ; si je ne puis, salues-la cherement. Elle sçait bien que la Praetention que j'ay en elle n'est autre chose que son eternelle beatitude, praetention que je la supplie de favoriser de tout son pouvoir. Amen. Vive Jesus !

Je suis sans fin, et sans varier ni peu ni prou, parfaitement vostre, ma tres chere Fille.

IX aoust 1620.

A ma tres chere Fille en [N. Sr],

Ma Seur Jean . Charle [de Brec]hard,

Superieure de Ste Marie de la Visitation.

A Moulins.

Revu sur l'Autographe conservé à la Visitation de Nantes.