Lettre MDCCVII. À la Mère de Chantal, a Paris

L'opinion de François de Sales sur la juridiction la meilleure pour les Ordres de femmes.

Annecy, [juillet-octobre 1620 ]

Ma tres chere Mere,

Je voy des gens de qualité qui penchent grandement et jugent qu'il faudra que les Monasteres soyent sous l'authorité des Ordinaires, a la vielle mode restablie presque par toute l'Italie, ou sous l'authorité des Religieux, selon l'usage introduit des il y a quatre ou cinq cens ans, observé presque en toute la France.

Pour moy, ma tres chere Mere, je vous confesse franchement que je ne puis me ranger pour le present a l'opinion de ceux qui veulent que les Monasteres des filles soyent sousmis aux Religieux, et sur tout de mesme Ordre, suivant en cela l'instinct du Saint Siege, qui, ou il peut bonnement le faire, empesche cette sousmission. Ce n'est pas que cela ne se soit fait et ne se fasse encor a present loüablement en plusieurs lieux; mays c'est qu'il seroit encor plus loüable s'il se faysoit autrement: sur quoy il y auroit plusieurs choses a dire.

De plus, il me semble qu'il n'y a non plus d'inconvenient que le Pape exempte les filles d'un Institut de la jurisdiction des Religieux du mesme Institut, qu'il y en a eu a exempter les Monasteres de la jurisdiction ordinaire qui avoit une si excellente origine et une si longue possession.

Et en fin, il me sem.ble que veritablement le Pape a sousmis en effect ces bonnes Religieuses de France au gouvernement de ces Messieurs ; et m'est advis que ces bonnes filles ne sçavent ce qu'elles veulent, si elles veulent attirer sur elles la superiorité des Religieux, lesquelz, a la verité, sont des excellens serviteurs de Dieu, mais c'est une chose tous-jours dure pour les filles, que d'estre gouvernees par les Ordres, qui ont coustume de leur oster la sainte liberté de l'esprit.

…………………………………………………………………………

0 ma tres chere Mere, je salue vostre cœur qui m'est pretieux comme le mien propre. VIVE JESUS !

FRANçs, E. de Geneve.