Lettre DCCCXXX. À la Mère de Chantal

Comment recevoir les remèdes imposés par l'obéissance et la raison. - Les croix qui répugnent aux sens et à la nature. - Dans la maladie, la Mère de Chantal doit être " brebis " et " colombe. "

Annecy, .30 novembre 1612 .

Je vous asseure, ma tres chere Mere, ma Fille, que je voudrois bien porter en mon cors et en mon cœur toutes les peynes que vous aures parmi vos remedes ( lettres 826,827 ); mais ne pouvant ainsy vous en descharger, embrassés saintement ces petites mortifications. recevés ces abjections en esprit de resignation, et, s'il se peut, d'indifference. Accommodés vostre imagination a la rayson, vostre naturel a l'entendement, et armés cette volonté de Dieu en ces sujetz d'eux mesmes desaggreables, comme si elle estoit en des sujetz les plus aggreables. Vous ne recevés pas vos remedes par vostre eslection ni par sensualité ; c'est donq par obeissance et par rayson : y a-il rien de si aggreable au Sauveur ?

Mais il y a de l'abjection. Et saint André et tant de Saintz ont souffert la nudité par maniere de croix. 0 petite croix, tu es aymable, puisque ni les sens ni la nature ne t'ayment point, ains la seule rayson superieure.

Ma tres chere Mere, mon cœur saluë le vostre filialement et plus que filialement, au dessus de toute comparayson. Soyés une petite brebis, une petite colombe, toute simple ( Mt 10,16 ), douce et aymable, et sans replique ni retour. Dieu vous benisse, ma tres chere Mere; qu'a jamais nostre cœur soit en luy et a luy. N'occupés pas vostre esprit es affaires, et recevés humblement et amiablement les petitz traittemens que vostre infirmité requiert.

Vive Jesus et Marie ! Je suis celuy que ce mesme Jesus a rendu vostre.

FRANÇs, E. de Geneve.