Lettre DCCCXXXII. À Madame Bourgeois, Abbesse du Puits-D'orbe

Un voyage en Bourgogne empêché par un voyage à Turin. - Pour s'avancer dans l'amour de Dieu, une jambe infirme est meilleure que l'autre.!

Annecy, 18 décembre 1612.

Sans doute, ma tres chere Seur, que je ne passeray jamais en Bourgoigne sans aller voir vostre ame bien-aymee, qui est tous-jours presente a la mienne ; mais je ne suis pas prest pour aller en ces quartiers la. Il faut que je me treuve a Turin pour le saint Caresme. Monsieur [de Sauzea] m'escrit que vostre Mayson s'avance fort a la pieté , dont je me res-jouis selon la mesure avec laquelle je vous souhaitte toute sainteté.

Hier je receus vostre billet, et j'y respons hastivement ce matin. Mais je ne sçai nulles nouvelles de vostre santé, c'est a dire de l'estat de vostre pauvre jambe, de laquelle vous ne me faites nulle mention, non plus que si vous n'esties pas ma chere Fille, et que cette jambe ne fust pas la meilleure des deux pour vous avancer en la perfection de l'amour divin. Et vous sçavés, ma tres chere Fille, que je vous ay tous-jours dit que vous m'escrivissies plus amplement par l'entremise de madame la Presidente ( Mme Brûlart. ), qui aura bien le soin de m'envoyer vos lettres, comme aussi de vous faire tenir les miennes.

M. l'Abbé de Saint Maurice ne donne pas la survivance pour le prieuré de Semur, ne le pouvant pas faire ; mais en toute occurrence de vacance, je feray tout ce qui me sera possible pour monsieur vosfre frere .

Je suis plus que jamais, ma tres chere Fille, d'un cœur invariable,

Vostre tres humble serviteur,

FRANÇs, E. de Geneve.

18 decembre 1612, a Neci.