Lettre DCCCXXXI. À la Meme

Une auditrice que François de Sales a vue au sermon ; pourquoi il n'a pas osé l'aborder. - Un sermon " fait hardiment et passionnement." - Le dixième anniversaire d'un sacre. - Prédicateurs de l'Avent.

Annecy, 9 décembre 1612 .

J'ay bien veu au sermon nostre bienaymee fille Françoise , mais je n'ay pas osé luy demander comme ma tres chere Mere se portoit ; car il y avoit trop de gens qui m'eussent oüy, et eussent esté en peyne de curiosité pour sçavoir quell'estoit cette tres chere Mere, autre que Dieu et ses Anges et ses Saintz, et nostre cœur, ne sachant combien l'affection qui me rend pere, filz et une mesm'ame avec vous, est suffisante et plus que suffisante pour faire cela.

Je donne donq la charge a ce petit billet de vous demander de vostre santé, et a nostre chere petite fille de vous redire quelque chose du sermon, lequel j'ay fait hardiment et passionnement. Et entr'autres choses, ayant differé hier de parler de mon sacre, a cause qu'aujourduy j'aurais plus de gens , j'ay dit quil y avoit dis ans que j'avois esté consacré, c'est a dire que Dieu m'avoit osté a moymesme pour [me] prendre a luy et puis me donner au peuple ( Lettres 4, lettre 494 ) ; c'est a dire, qui! m'avoit converti de ce que [j'étais ] pour moy en ce que je fusse pour eux. Mays pour ce qui nous regarde, vous sçaves que Dieu m'a osté a moy mesme, non pas pour me donner a vous, mais pour me rendre vous mesme. Ainsy puisse-il advenir, qu'ostés a nous mesme, nous soyons convertis en luy mesme par la souveraine perfection de son saint amour. Amen.

Bon soir, ma treschere Mere, et plus que Mere; le bonsoir a nos filles. .

Non, ce n'est pas le P. Archange du Tillet , c'est le P. Constantin de Chamberi qui sera nostre prœdicateur le reste de cet Advent, et moy je seray souvent celuy de nos cheres Seurs, car ce n'est pas souvent, soit tousjours, que je suis le vostre.

Revu sur l'Autographe conservé au 2d Monastère de la Visitation de Rouen.