Lettre DCCCLXXV. À la Mère de Chantal

Le Saint se dispose à repartir pour la Savoie. - Une protectrice pour la Visitation. - Messages et avis divers.

Turin, 14 mai 1613.

Et moy, ma chere Fille, je vous escris encor plus courtement pour responce a vostre lettre du 5 de ce mois, tant pour mille petites affaires et visites que je reçoy, que pour la ferme esperance que j'ay de vous voir bien tost, resolu, Dieu aydant, de partir d'icy samedi ou Dimanche prochain , pour estre a Neci au jour de la sainte Pentecoste , puisque je n'arreste plus que pour l'affaire de ces pauvres bannis ; car, quant aux despeches, je laisseray le bon M. de Blonay qui, de bon cœur, demeurera pour les solliciter. Mais cette negociation de l'appaisement de Monseigneur de Nemours ne peut estre faite qu'en presence ; or, j'ay toute ma confiance en Dieu d'en reüscir.

Je vous ay des-ja fait sçavoir que nous aurons madame la Duchesse de Mantoue, qui est la vertu mesme, pour nostre protectrice ; mays il ne faut pas encor en faire du bruit, pour une rayson que je vous diray. M. de la Bretonniere est encor en volonté de nous ayder en quelques choses pour l'edification de nostre oratoire .

Caressés cordialement les messieurs qui s'en revont, en particulier M. Floccard . Je suis en peyne du retardement de madame des Gouffiers ( note 10 ), remettant neanmoins cela a la sainte providence de Nostre Seigneur, comme aussi nostre pauvre petite malade . Nous ramenerons vostre filz , qui, a la verité, a grand desir de s'employer a la guerre, si elle suit.

Je salue fort ma chere fille madame de Thorens, et Mlle de Rabutin , qui est aussi ma fille ; comme encor toutes celles qui sont autour de vous, que vous sçavés m'estre pretieuses plus qu'il ne se peut dire .

Dieu soit a jamais dedans nostre cœur, pour y vivre et regner eternellement. C'est luy qui sçait ce qu'il luy plaist que nous soyons, en la tres parfaite union qu'il a faite en luy mesme et par luy mesme. Amen.

A Thurin, le 14 may 1613.

Il seroit mieux qu'on accommodast le proces en mon absence, a cause de ma trop grande condescendance . Je prieray pour le pauvre sire Pierre, et louë Dieu qu'il soit passé en bonne disposition .

A Madame

[Madame] la Baronne de Chantal,

Superieure de la Visitation, a Neci.