Lettre DCCCLXXXI. À Madame de Giez

Un bienfait extraordinaire pour une jeune femme. - Trois vertus qui comprennent toute la dévotion. - Souhaits de piété. - Moyen de rendre plus doux le joug du Sauveur.

Annecy, [fin mai ] 1613.

Madame,

J'ay esté estonné quand j'ay sceu que vous n'avies pas receu le remerciment que je vous avais fait, pour l'honneur qu'il vous pleut me departir en m'escrivant. Croyes, je vous supplie, que je ne suis pas si ingrat et nonchalant que d'avoir oublié ce devoir-la. Mays puisque cette action de grace ne vous est pas arrivee, je la refay maintenant de tout mon cœur, vous asseurant que c'est avec un grand surcroist de l'estime que j'avais de vostre bienveüillance, par la description plus particuliere que Madame de Baume m'a fait des qualités et conditions de vostre esprit, que j'ay treuvé extremement aymable, priant Dieu qu'il luy playse les affermir et accroistre de plus en plus.

C'est un benefice extraordinaire, qu'entre les aggreemens du monde, emmi le printems d'une jeunesse et entre les loüanges de plusieurs, vous aymies et estimies les saintes vertus. Celles d'humilité, de modestie et de douceur sont celles qui comprennent toute la tres sainte devotion. Seigneur, disoit le Roy David ( Ps 70,17 ),

vous m'aves enseigné des ma jeunesse, et jusqu'a present j'annonceray vos merveilles. Que reste-il, ma chere Dame, sinon qu'il playse a cette souveraine Bonté de vous tenir de sa main, affin que vous puissies dire avec le mesme Roy ( id, 18 ) : jusqu'a ma viellesse et decrepitude, Seigneur Dieu, ne me delayssés point. Faites que cette aube croisse jusqu'au plein midy ( Pr 4,18 ) du saint amour celeste, et que vostre printems fleury se convertisse en une automne fructueuse.

Pour moy, je me res-jouy infiniment avec vous de quoy l'Espoux sacré a touché les entrailles de vostre ame et vous a fait odorer le parfum de ses attraitz, et ne puys m'empescher de vous dire que vous couries apres luy ( Ct 1,2 ), et que vous couries de sorte que vous le puyssies . attaindre ( 1 Co 9,24 ; TAD liv 3, ch1 ). Vous estes bien heureuse d'avoir un mary si chrestien comme est celuy que Dieu vous a donné en sa debonnaireté, car le joug

du Sauveur, qui est en soy si doux et suave ( Mt 11,28 ), le devient encor davantage quand deux le portent ensemblement.

Je ne cesseray jamais de vous honnorer d'un respect et amour fort particulier, et vous souhaiteray tousjours la perfection du divin amour. Obligés moy, Madame, de vostre dilection, et implorés sur mon ame la misericorde souveraine de nostre Createur, auquel et pour lequel je suys et veux estre des-ormais fort entierement,

Madame,

Vostre tres humble et tres affectionné serviteur,

FRANçs, E. de Geneve.